Suba ka KSU ba don ka jinglehtuh ha ka thungkam ha ki College, phah tuklar ha ka Sorkar

Shillong, ïaïong, 03: Ka Education Cell jong ka Khasi Students Union (KSU) dang shen ka la ïakynduh ïa u Secretary ka tnat Pule Puthi ka Sorkar Jylla u Ambrose Ch. Marak ban ïakren halor ka mat thungkam ïa ki nonghikai ha ki College bapher bapher lyngba ki Govt. Sanction Post kaba dang ïaid shakhmat.
“Ka Seng ka la shim ïa kane ka sienjam hadien ba ka la ïoh jingtip ba ka don jingthmu leh buit tuh da ki katto katne ki nongpynïaid jong ki jaka pule ban thep ne pynrungkam ïa kiwei pat ki jaidbynriew da ki lynti ki bym dei bad kiba ïaid lait ïa ka Reservation Policy jong ka Jylla Meghalaya,” ong u kyrwoh ba la phah da u Education Secretary jong ka KSU-CEC u Samla Raymond Kharjana.
“Na ka liang jong u Secretary ka tnat Pule Puthi u la kular ban shimkhia ïa kane ka kam bad ban pan jingpynshai na ki nongpynïaid jong ki College halor ka rukom jied ïa ki nongthep kam baroh,” u la ong.
“Lyngba une u kyrwoh, ka seng ka pynsngew ruh ba lada lap ba ka don kano kano ka jingiuhroit ïa ki paradoh parasnam ha kane ka jingthungkam ha ki jaka pule ne thungkam da kaba ïaid lyndet ïa ka Reservation Policy ka seng kan shim da kiwei pat ki sienjam kiba tyngeh bad ka jingkitkhlieh baroh kan dei halor ka Education Department jong ka Jylla,” la maham ka Seng.
Dang shen, ka Education Cell jong ka Hynñiewtrep Achik National Movement lyngba u Chairman u Bah Kyllang Thongni, u la ong ba ka Seng ka la ïoh jingtip ba ka don ka jingthmu ban leh lyndet jong ki bor pynïaid College ha kane ka jingthungkam ha ki Govt. Sanction Post bad ka seng ka dawa ba ka Sorkar ka dei ban tuklar mardor halor kane.
“Ngi kyntu ïa ka tnat Pule Puthi jong ka Sorkar Jylla ba ka dei ban shimkhia halor kane,” u la ong.