Ki samla kim dei tang ka lawei, ki dei ruh ka jingkyrmen bad nong pynwan dur ïa ka lashai : President KSU

Khliehriat Iaiong 03: Ha ka jingialang ba la pynlong ha Khliehriat West myn ha ka sngi saitjaiñ, u nongialam ba rangbah jong ka Khasi Students Union Central Executive Council, u samla Lambokstarwell Marngar, u la pashat ïa ki kyntien shongsbai sha baroh ki khun samla da kaba ong ba “Ki samla kim dei tang ka lawei jong ka ri bad ka jaitbynriew, hynrei ki dei ruh ka jingkyrmen, ki nong oh shrong bad ki nong pynwandur ïa ka lashai la shi sngi jong ka ri bad ka jaitbynriew” ha kajuh ka por u la buh ruh ki kyntien sneng kyntu ïa ki nongialam bad ki dkhot jong ka Khasi Students Union East Jaiñtia Hills District Unit.
Ha katei hi ka sngi, la saiñdur ruh ïa ka Khasi Students Union East Jaiñtia Hills Unit ha kaba utei u nongialam ba rangbah u la pynskhem bad pyn bam smai ïa ki nongialam bad ki nongkitkam jong ka seng.
Haba kren kyllum lang sha baroh ki nongïalam sengbhalang kiba la ïa don ryngkat lang ha katei ka sngi, u tei u nongialam rangbah ka KSU u la ong “Ka kam nongialam kam dei ka paiñsngiat hynrei ka dei ka kamram bad kata ka jngkit kaba khia ka don ha nga bad ha phi, ki jingshah beiñ ruh kiba bun, ki jingshah kynthoh ruh kiba bun, ki jingpyntieng ruh kiba bun bad ki jingwoh kjat ruh kiba bun, hynrei tang kita kiba skhem ka nongrim ki hap ban iaineh, lada sngap ki ong balei phi sngap, lada phi kren kin ong balei phi shu bun nia bad ngin nym sngap ïa kita kiei kiei hynrei ngi dei ban leh ïa kaei kaba bha tam ïa kaba kum ka jaitbynriew bad kum ki samla ngi donkam ban noh syniang ïa ka ri bad ka jaitbynriew baroh kwei”
U la ong ruh ba “ka jingangnud ka seng ka long ban pynskhem ruh ïa ki paia ha ka ri baroh kawei, kiba bun ki mat ngi la buh ha khmat ka sorkar bad ki dang bun pat ki dang sahkut ngim tip ïa ka daw tynrai hynrei kiba don hapoh Secreteriat ki tip kham bha, hynrtei kum ka seng bad ki kynhun sengbhalang ngin nym man thait ban iai pynsawa bad iai pynsngew sha ka sorkar ban pynurlong, kaba long na ka bynta ka jingmyntoi ïa ka ri bad ka jaitbynriew”
Shuh shuh haba kren sha ki nongialam ka KSU East Jaintia Hills u la ai mynsiem ba kin kren beit ïa ki mat ban tei ïa ka ri bad ka jaitbynriew bad ong ruh ba ka “East Jaiñtia Hills bad ka West Jaiñtia Hills ki dei ki district kiba ju pynmih bun bha ïa ka khajna sha ka sorkar, hynrei haba peit pat ha ka pule puthi dang bun kiba wan wad jaka pule sha sor Shillong, ka la dei ka por bad ka ia ban don noh ki jaka pule kiba biang hangne ha ri lum Jaiñtia hi baroh kawei, wat ka Medical College ruh lah donkam ban don ha kane ka thaiñ, kumta kum ka seng ym dei ban man thait ban kren ïa kum kine ki jingdonkam khamtam ki jingeh jong kiba uba bun ba lang kiba ju iakynduh man ka sngi”
Da ka mynsiem ba sngew khia u la kren ruh ïa ka jingeh ba ki nonghikai skul ki ïa kynduh ha kaba bunsien ki iam kthang bad mih sha madan sha surok ban dawa ïa la ka jong ka hok jong ki “Ngi im ha kaba kum kata ka synshar ka khadar, hynrei phi ki samla ki nongialam ba pura ka KSU to phin ïai long ki nongtied jingkhang ïa ka synshar khadar ba kan long kaba beit bad kaba ïaid ryntih haduh ba ki samla wadkam wad jam ki nonghikai ruh kin don ka jingshaniah, namar ka don ka jingsngewtieng lada ka jinglong jingman ka iai long sah ha kane ka rukom” la bynrap.
Haba kren pat halor ka phang ban iada ïa ka ri ka jaitbynriew, ban ïada ïa kata ka jinglong ba kyrpang jong ka jaitbynriew u bah Lambokstarwell u la ong ba “Ngim ju kwah ban jrong kti ïa kiwei bad lada kiwei ki wan tam pud kam dei ka pop kam dei ka sang, lada ka jingthombor ki mynder ri ïa ki para doh para snam ka dei ka aiñ, ka kamram jong ka kput ruh kan dei ka kamram jong ki samla ka jaitbynriew, haba nga kren ïa kata ym dei ba nga pynshit ban wanrah ïa ka jingsngew pher jaitbynriew hynrei haba ngi iada ïala ka khyndew ka syiap ngim shym la tuh ïa ka hok jong kiwei ka dei ka kamram jong ngi ban pynneh pynsah ïa ka jinglong ba kyrpang ka ri bad ka jaitbynriew, shi sien pyrkhat hateng hateng, ka buh ka jingkylli shano ka jaitbynriew kan poi, ki don kiba ong ba hap ban iatih tyllong ba nangno ngi wan kum ka jaitbynriew nga ong to ngin kylli shwa shano ngin leit kum ka jaitbynriew?
Lada phi sngewtuh shano ngin leit ka dei ka kamram jong ngi ban pyneh pynsah ïa ka jinglong ba kyrpang ka jaitbynriew, ka la don ka jingong ha kine ki sngi ba ka KSU ka dei ka seng pyrshah sorkar, ka seng ba pyrshah ïa ka roi ka kiew, hynrei nga ong ba ngim pyrshah ïa ka roi ka par kaba long ka jinghkyrkhu lada ka wan da ka lynti kaba shai, ngim dei ka seng pyrshah sorkar, nga kren shai mynta ka long ba ngin iai long pat ka liang pyrshah ïa ka sorkar ha ka synshar paidbah lada ka leh ïa kano kano ka bym dei ka ba ktah ïa ka mynta bad lashai ïa ka ri bad ka jaitbynriew, ngi ai ka jingkyrshan lada ka leh ia kaba dei bad ngin woh bad ngin kynthoh lada leh ïa ka bym dei”.
“Ngi kwah ban long ki mraw ne ban long ki kynrad hala ka jong ka khyndew ka shyiap? Kan nym don kano kano ka bor kaba lah ban pyn synjor ïaka mynsiem ba shynrang namar ngi sngewthuh shai ba ka jaitbynriew jong ngi ka duna ha ka jingdon briew (quantity) hynrei ka bun pat ha ka jinglong ba tbit (quality) ban long kum ki nonghialam ki ban aiti met bad mynsiem.Watla ka don hapdeng ka jingkylla bapher bapher hynrei nga sngew ban ong ba ka shong ha ngi pat ban pyrkhat ba ka lynti iaid kaba kumno kaba ngin jam nagne sha khmat, ki samla ieid ri ki long kum kato ka um kaba tuid, lada don ba khang lynti kata kam dei ka jingkut hynrei ngin wad pat ïa ka lynti ban poi sha ka thong, lada ngi ngam ïa kata ka dei ha ngi ban pyrkhat ha ka jingiad kaba kumno kaba ngi hap ban iaid nagne sha khmat, ngi sngewthuh ba ki bun ki jingpyntieng pynsmiej haba ngi shakri ïa ka ri ba djaitbynriew, hynrei ngin pynlong ïa kita ki jingeh kum ki maw pun tangba ngi donkam ka jinglong ryntih, buh ïa ka thong bad ruh ban phai khmat ruh sha u Blei nongbuh nongthaw ban ialam lynti ïa ka jaitbynriew”
“Ka don ka jingong ba u khulom u kham nep ban ïa ka waitlam, hynrei ka don pat hateng ha teng ba ka don ka jingma kaba khraw lada ngi pyndonkam bakla ïa uta u khulom, lada pyndonkam ha ka lynti kaba dei kata ka dei ka jingkyrkhu bad jingsngew shngaiñ”
U myntri ka sorkar jylla uba la ia don ryngkat lang ha ka jingialang, u bah Kyrmen Shylla ua ai ki kyntien sneng kyntu ïa ki sengbhalang bad ai ruh ka jingkyrmen ba ki mat jingdawa kin sa urlong kumba ki la iai shah shitom baroh shi katta tangba kum ki seng ki dei ban bud dien na ka por sha ka por, ha kaba iadei bad ka jingpynneh pynsah ïa ka khyndew ka shyiap bad kumno ban iada ïa na ki bar jylla, u la ong ba”Ka don ka 6th schedule bad ngi dang dawa ruh ïa ka ILP bad ka kam ka dang iaid, hynrei kawei kaba donkam ka long ba ngin long ki nongshong shnong kiba don ka jingkitkhlieh, hooid na ka liang ka sorkar sngewtynnad ban iohi ba phi ieng tylli ban iada ïa ka ri bad ka jaitbynriew bad kane ka sorkar MDA ruh ka ïa trei ryngkat ryngkat bad ki seng, kum ha kane ka mat jing pynbeit ïa u pud u sam ka sorkar ka la khot lang ïa ki dkhot sengbhalang ban iakren lang ban ai jingmut lang ban pynneh pynsah ïa ki jaka puta”
Ha kajuh ka por u tei u myntri ka sorkar jylla u la ai ruh ka jingkhublei kitbok kitrwiang ïa ki dkhot ka KSU East Jaintia Hills Unit ba kin nangtrei bha na ka bynta ka ri bad ka jaitbynriew.
U nongialam ba rangbah, u President jong ka Jaintia Students Movement u la ong ba ka long kaba donkam ban pynthymmai, ban shna bun ki shnat treikam bapher bapher ha kiba bun ki jaka ki ba don ki khun ki hajar “Nga kubur ruh ba lada ka KSU ka dang don, ka mut ka jaitbynriew jong ngi ruh ka dang im, u la ai ka jingkitbok kitrwiang ïa ki nongialam bad ki dkhot ka KSU East Jaiñtia bad kyntu ruh ïa ki ba kin long kiba don ka mynsiem kaba shynrang kumba long ki nongialam bad ki dkhot ka KSU Seng Kmie na Shillong.
U President ka KSU East Jaintia Hills District Unit, u bah Streamly Suchen u la ong ba “Kum ka seng bad kum ki dkhot ka jaitbynriew ngi sngew khia shisha na ka bynta ka ri bad ka jaitbynriew namar ka jaitbynriew jong ngi ka don ha tmier ka riat bad teng teng ngi pyrkhat ba lano ka umsaw kan wan ban kit noh ïa ka jaitbynriew bad nga sngew kitram haba pyrkhat ba ki dang don shibun ki samla kiba la mih madan kiba la aiti bad len ialade na ka bynta ka dawbah jong ka ri bad jaitbynriew, ngim lah ban len ba ka jaitbynriew jong ngi ka don shibun ki nngialam bad ki khlawait haba phai naduh ki por ba hyndai bad haduh mynta” kum u nongialam u la pan ïa ka jingiatreilang bad kyntu ïa ki para dkhot ban ai ka jingiatreilang ban pynheh pynsah, ban pyniair ïa ka lygkha trei na ka bynta ban pynneh ïaka khyndew ka shyiap hapoh kane ka bri hynniewtrep, u la kyntu ruh ba kim dei ba thew ïa ki jingduna hynrei haba don ki jingduna dei ban iakren, ïa pynbeit da ka lynti kaba bha ha ka ophis treikam jong ka seng.
Myn ha ki por ki sngi kiba la leit ia ka Khasi Students Union ha ri lum Jaintia la khot kyllum lang da ka KSU Jaintia Hills Unit bad mynta ka sngi ka 2 tarik u iaiong 2022 la pynskhem ia ki nongialam bad ki dkhot ba pura jong ka KSU hapoh ka district ba la tip kum ka Khasi Students Union East Jaintia Hills District Unit, ha kaba la wan ban pyn bam smai ia ki nongkitkam bad ki dkhot da u President rangbah ka seng u bah Lambokstarwell Marngar.
La sakhi lang ruh ia kane ka jingplie Unit ha East jaintia Hills District da ki nongialam jong ki sengbhalang bapher bapher ba kumthup ka JSU ba la mih khmat da u President, u samla Jersom Shylla, u President ka Jaintia Students Movement, u bah L.S.Rymbai, u President ka Federation of Khasi Jaintia and Garo People East jaintia Hills District, u bah Mac Meral Suting, ka president jong ka STIEH, ka kong Deiwi Tongper bad kiwei kiwei, kumjuh ruh la ia don ryngkat lang u myntri ka sorkar jylla, uba dei u MLA ka thain u bah Kyrmen Shylla, u Deputy CEM ka Jaintia Hills Autonomous District Council u bah Lasky Rymbai, u MDC Khliehriat, u bah Finelyness Bareh bad kiwei kiwei.
La ioh ia ki jingdwai na u Rev Fr George Shinning Lyngkhoi, u Rev Emlangmi Sapuh.
Ki nongialam jong ka KSU-EJHU kiba la pynskhem bad shah pynbam smai ha kane ka sngi, ki kynthup u President, u samla Streamly. S.Suchen, Vice President, u bah Satly Ryngkhlem, General Secretary, u bah Kwilnis Suchiang, Assistant General Secretary, u bahPynshaikupar Dkhar, Finance Secretary, u bah Shaniahskhem Dkhar, Assistant Finance Secretary, u bah Cherity Suja bad u bah Khihlang Shylla,, Organising Secretary, u bahDeiniwan Lyngdoh, Assistant Organising Secretary, u bah Olenbat Pdang, Chibait Rymbai bad u bah Donbok Mukhim, Education Secretary, u bahEmmon Chyrmang, Assistant Education Secretary, u bah Santoba Bamon, u bah Benito Suja, Publicity Secretary, u bahHamewnpynhun Ryngkhlem, Assistant Publicity Secretary, u bah Meshak Kyndoh, Office Secretary, u bahJovelity Dkhar bad Kyrshan Dkhar, Environment and Socio Cultural Secretary, u bah Phanuel Tongper bad kiwei kiwei.
Ia ka jingialang la pyniaid da u Organising Secretary KSU Seng Kmie, u samla Ostanic Marbaniang.
Ha kane ka sngi la ia don ryngkat lang ruh ki nongialam bad ki dkhot jong ka KSU Barak Valley na Assam. La pynbyrngia ia ka prokram da ki jingshad na ki samla jong ka KSU Girls Wing East Jaintia Hills District.