Nongstoiñ, Ïaiong 3: Ka FKJGP bad ka KSU West Khasi Hills District ha ka jingïalam jong u bah John Fisher Nongsiang President KSU West Khasi Hills bad u bah Chandra Nongdkhar President FKJGP West Khasi Hills, ha ka sngi saitjaiñ ki la leit jurip ïa ka jingtrei jong ka surok Nongstoiñ-Sohpian, kaba la sanction da ka National Highway PWD (Road) Meghalaya kumba Rs 8,94,95,324.
Ha ka jingleit jurip bad thew ïa katei ka surok surok, ki la shem ba ka ïapher katkum ka DPR jong ka National Highway ïa ka rukom pyntrei u Contractor. Ha ka jingshisha katei ka surok ka dei tang kata kaba la tip kum ka “one time improvement for strengthening of existing pavement”, kaba shu siang ban beit ïa ka rong barim ïa kaba lah don lypa.
Ka jingjrong ka long 6.84 kilometer bad ka jingheh ka long na ka bynta 1150 meter ka dei 7.00 meter. Nangta ki don ki jaka ba hap siang 7.00m duna kata 6.80 haduh 5.70 meter bad kaba sah nangta shaduh Sohpian ban ïa soh bad ka surok National Highway 44 bye pass, kam dei ban duna ïa ka 3.75 meter. Hynrei sngewsih la shem ba ka rukom siang ïa katei surok kaba bun ki jaka ki duna, hateng hateng ki duna kumba 2 phut lane 1 meter duna ei ei naduh ba sdang haduh ba kut ka shilynter katei ka surok. Wat ïa ka rukom khleh rong ruh I kumba kam da biang bha.
Kumta na ka liang ki ar tylli ki seng ki dawa bad kyntu ïa katei tnad PWD National Highway, ba ka dei ban khmih bha ban phah trei pynbiang ïa katei ka jingduna. Namar katei ka surok ka dang don ka jaka kaba dang biang bha ban siang ïa ka rong, nalor ba ka jingsiang ka barim ka dang rit lypa, hynrei u contractor u dang pynrit shuh shuh. Lada katei ka Department kam leh ei ei ïa kane ka kam, na ka liang ki ar seng kim banse ban hap ban ïaid ha ki bor ba halor.
Na ka liang ki seng ki da kyrshan tyngeh ïa kaei kaba u MLA u la dep dawa sha ka tnad PWD jong ka sorkar, ba kan buh sanction noh ki foothpath na ka bynta ka 1 kilometer tam bad ka Intermediate ha baroh shilynter katei ka surok. Ki ar seng ruh ki dawa jur ïa ka sorkar baka dei ban ai beit noh syndon da ka two lane ym shuh da ka intermediate, namar katei ka surok ka dei ka surok kaba kham donkam tam na baroh ha ka nongbah Nongstoiñ.
