Plie u Bah Renikton ïa ka ïingdorbar ba kot 20 lak ha shnong Marshilong, South West Khasi Hills

Mawkyrwat, Ïaïong 03: U Myntri ka tnad umbam umdih jong ka Sorkar Jylla bad kum MLA jong ka Mawkyrwat Constituency, u bah Renikton Lyngdoh Tongkhar ha ka sngi saitjaiñ jong ka taïew ka 02 tarik u Ïaïong, 2022 u la ïoh ban plie ïa ka ïing Dorbar Hall ba thymmai jong ka shnong Marshilong, South West Khasi Hills District ha ryngkat ka jingïadonlang u Block Development Officer ka Mawkyrwat C&RD Block, u bah I. Lawryn-niang, MCS kum u symbud kongsan.
Ïa kane ka Dorbar Hall ba thymmai la pyntrei lyngba ka skhim 100 sngi ne MGNREGS jong u snem 2020-21 ha ka jingmang pisa kaba la kot T. 20 lak tyngka bad nalor kane ka don ruh ka jingmang ba kynthup lang ruh ban shna pynbha ïa ka phyllaw kaba kot T. 8 lak tam bad kumjuh ruh ïa ki jingker ne fencing ba kot T. 8 lak ei ei bad haba kheiñ lang ïa ka pisa baroh ka long T. 36,78,502/- tyngka.
Haba kren kum u kongsan, u bah Renikton Lyngdoh Tongkhar u la ong ba da ka jingïoh ïa kum ka kane ka jingtei (ka Dorbar Hall) kan long ka jingkyrkhu kaba khraw ïa ka shnong Marshilong ha kaba kin ïoh ban pyndonkam ha kiba bun ki bynta kumno ban ïa thir jingmut ban pyntyllun ïa ki kam hapoh ka shnong ka thaw. U la pynpaw ka jingkmen ba kum ka shnong Marshilong ka long kawei na ki shnong ba don ka jingïatylli ha ki kam baroh namar da ka jinglah ban pynurlong ban plie paidbah ïa kane ka Dordar Hall ka dei lyngba ka jingtreishitom, jingïatreilang jong ki bad kaba la i hun shisha ban peit.
Haba kren ïa ka phang kaba dei shaphang ka ‘um’ ïa kaba na ka liang ki nongïalam shnong ki la pynsngew, u bah Renikton u la ïathuh ba halor kane ka bynta ban pynpoi um ha manla la ki thliew ïing jong ka shnong Marshilong la dep ban mang, sah sa tang ban khot nongpyntrei (tender). “Ban pynpoi um ha ki thliew ïing la mang lyngba ka Rural Infrastructure Development Fund (RIDF) kaba kot ïa ka 13 klur tam bad kane ka kynthup na ka bynta ki lai tylli ki shnong kata, ka shnong Marshillong, Sakwang bad Pyndensakwang”, ong u bah Renik.
U la ïathuh ruh ba na ka bynta ka jingdonkam lyngba ka umbam umdih, ha kine ki jaka jong ngi bad wat hapoh jong ka konstitwensi ka jingmang pisa kam duna shuh ïa ka T. 150 klur ei ei ban pyntreikam. Namar-kata, u la khmih lynti ki paidbah kin ïohi ïa ki sngi ba bha ha kaba kin ïohi ïa ki kor um ha manla ki thliew ïing bad kane ka dei ka jingkut jingmut bad jingthmu jong ka sorkar Meghalaya bad ka Sorkar India ban wanrah ïa ka roi ka par ha ki paidbah nongshong shnong.
U la pynkynmaw ruh ba ha ka 30 tarik u Lber, 2022 ka sorkar India ka la dep ban pyllait haduh T. 400/- klur duna (Central Share) katba na ka liang ka sorkar Jylla pat ha ka 31 tarik u Lber, 2022 ka la pyllait haduh T. 71/- klur ha kaba kane ka pisa ka dei na ka bynta ban pyntyllun ïa ka jingpyntrei na ka bynta ka skhim umbam umdih jong ka Jal Jeevan Mission (JJM).
Namarkata, u la buh ka jingkyrpad ba ban pyntyllun ïa kane ka kam khraw, ka donkam ïa ka jingïatreilang bad jingai ka kti kamon ka kti kadiang jong ki paidbah nongshong shnong khnang ba ka kam kan long kaba ïaid beit ïaid ryntih bad na ka bynta ka jingkwah jong ka sorkar ban pynpoi um ha manla ki thliew ïing, ki dorbar hall, ki ïing skul shwa u Nohprah jong kane ka snem kan long kaba jop.
Ha kaba ïadei bad ki dorkhas ba la ai da ka Dorbar Shnong, ka Seng Kynthei Shnong, ka Seng Samla Shnong, na ka liang u bah Renik u la kular ba un sa shimkhia kawei hadien kawei pat ban pyndep ïa kaei kaba ki ki kwah bad ong ruh ba ïa kaei kaba u lah un sa pyrshang ban leh ïa kaba bha tam.
U bah I. Lawrynniang, MCS, Block Development Officer, ka Mawkyrwat C&RD Block, u la ong ba ka jinglah ban plie ïa kane ka Dorbar Hall ka dei namar ka jingïatreilang bad trei shitom jong ki paidbah nongshong shnong ban pyndep ha i por i ba lyngkot.
U la ong ruh ba haba shim ïa ka kyntien, ‘ka jingroi jingpar’ bunsien la ju kren beit tang ba ka ïa dei bad ki jingshna kum ïa ki ïing, ki lynti, ki surok hynrei em kam dei ban long tang kumta, dei ban pyrkhat ruh ïa kiwei pat ki jait kam kiba long ka jingbha jingmiat jong ka shnong ka thaw naduh ki longkmie, ki khun samla bad kiwei kiwei de khnang ba ka shnong ka thaw kan long kaba lait na ki jingma kiba kum ka imlang ka sahlang ka mat ha kine ki sngi bad ban leh ïa kata ka donkam eh ka jingïatreilang.
Ha kane ka sngi na ka liang ka Shnong, ka Seng Longkmie, ka Seng Samla bad VO jong ka Shnong Marshilong ki la ïoh ruh ban ai ïa ka dorkhas (memorandum) hakhmat u bah Renikton Lyngdoh Tongkhar ba un ïarap lem na ka bynta ki jingdonkam nangne shakhmat.
Ïa kane ka program la pynshit pynshngaiñ lyngba ki ar tylli ki jingrwai kata ka Village Organization (VO) Marshilong bad kumjuh ruh na ka Seng Samla Shnong Marshilong.