Shillong, Risaw 11: Ka elekshon ban jied ïa u President ba thymmai jong ka All India Congress Committee (AICC) kan long ha ka 17 tarik mynta u bnai. Ki kyrtong ban ïakhun ïa kane ka elekshon ki long u Mallikarjun Kharge bad u Shashi Tharoor.
Ki dak ki shim ki paw ba u Kharge uba long u nongïalam ba la tymmen ba la 80 snem ka rta u lah ban jop suk pyrshah ïa u Shashi Tharoor uba dang 65 snem, namar ba u Kharge u ïoh ïa ka jingkyrshan na ka ïing ka sem ki Gandhi, wat lada ki kyntait ïa kane.
Na ka liang ka Meghalaya Pradesh Congress Committee (MPCC) kam pat rai satia ïano kan kyrshan, wat lada ka don kumba san ne hynriew vote ha kane ka jingïajied ïa u hehduh ka Seng Congress ha India.
Haba ïakren bad u Bah Pynshngaiñ N. Syiem, uba long uwei na ki Working President ka MPCC, u la ong ba kane ka jingïajied ïa u President ka AICC kan nym da shongshit eh ha jylla Meghalaya bad lada jop mano mano ruh kan nym da ktah than shane bad lada ka don ruh kan don malu mala.
Ka daw kaba u Working President ka MPCC u la ai ka long ba ki paidbah kin nym da peit than mano ba ïalam ïa ka Seng ha Delhi, hynrei kin kham peit ïa ki nongïalam ha ka jylla bad ki peit ruh ïa u kyrtong uba mih ban ïakhun na ka Constituency ba ki shong ki sah.
