Pdiang ka SSC ïa ka khusnam na ka Rotary Club ba la pynkup ïa u Bah Neil Nongkynrih

Shillong, ïaïong, 02: Ki dkhot jong ka Shillong Chamber Choir (SSC) ha ka sngi Thohdieng ki la pdiang ïa ka khusnam ba ka Rotary Club Shillong Heritage ka la pynkup burom ïa u nongseng jong kane ka kynhun rwai u Bah Neil Herbert Nongkynrih uba la khladnoh dang shen.
Ha kane ka jingïalang pynkup burom ba la pynlong ha Pinewood Hotel ,Shillong, la sakhi lang da u Rotarian Kishan Tibrewalla, u Assistant Governor, Zone X,Rotary District 3240.
Ka jingpynkup burom ïa u Bah Neil Nongkynrih ka long halor u synñiang u bynhei ba u la noh sha u sup u thiar jong ka rwai ka siaw ym tang ha kane ka ri India hynrei wat shabar jong ka ri India.
Kiwei pat ki nongshah pynkup burom da ka khusnam ki long u Bah Darsing Syiemlieh uba long uwei na ki nongshtah dur uba pawnam bha na West Khasi Hills District, ka Barikor ba pawnam jong ka jylla ka Kong Careen Joplin Langstieh, ka Kong Dasumarlin Majaw kaba long ka nongseng ïa ka Smoky Falls Tribe Cofee kum kawei na ki nongsengkam ba la pawkhmat, ka Kong Samanda Phanwar ka nongtrei monsngewbha kaba bat ïa ka kyrdan Programme Manager jong ka Lamjingshai Project of Manbha Foundation.
U Tibrewalla haba kren kum Symbud Kongsan u la ïaroh ïa u synñiang u bynhei jong kine kiba la shah pynkup burom da ka khusnam ban pynpaw ïa ka jylla Meghalaya ha ka map jong ka pyrthei lyngba ki kam ba ki trei.
Ha kane ka jingïalang la ïashim bynta lang da ki dkhot jong ka Club bad kiwei kiwei kiba la shah khot sngewbha.
U President jong ka Club u Sandeep Das u la pdiang sngewbha ïa ki nongïoh khusnam bad ïa ki nongshah khot sngewbha bad pynpaw ruh ba kane ka sngi kan long ka sngi kaba kongsan tam ha ka almanak jong ka Rotary Club ha ka pyrthei baroh kawei bad kane kan dei ka sngi ba kin ithuh bad ïaroh ïa ka jingtrei shitom jong ki paidbah lyngba ka kam kaba ki la jied ban trei.