Ki la shakri ha ka thma 1971 bad don bynta ha ka jingleit ai jingïarap kylleng

New Delhi, Ïaiong 02 : U Myntri ka tnad Ïada Ri ka sorkar pdeng, u Rajnath Singh ha ka sngi Saitjaiñ u la ong ba ka jingïada bad ka shongsuk shongsaiñ ha ka Ri kadei ka bynta kaba hakhmat eh jong ka sorkar bad dei na kane ka nongrim ka pyrshang lut ki lad ki lynti ban ïada bad pynneh ka jingïatylli bad ka jinglong kawei.
Ïa kane u la kren ha ka jingïalang ba la pynlong da ka Indian Air Force Station, Hakimpet hynne ka sngi ban rakhe ïa ka jingrakhe Diamond Jubilee jong ka jingshakri ka Chetak helicopter sha ka Ri.
U Myntri u ong ruh ba kadei hok ban ai ka burom ïa baroh kito kiba la don bynta ban shakri ïa ka Ri da ka jingtrei shitom bad ka jingaiti lut.
Nalorkata, u ong ruh ba man ka sien ba ka Ri ka ïakhun thma na ka bynta ka jingshngaiñ bad ka shongsuk shongsaiñ kam dei satia tang ki shipai hynrei ka ri baroh kawei ka ïakhun lang ïa ka. U ong ruh ba naduh ki scientist, ki engineer, bad ki technician na ki kynhun bapher bapher kum ka Hindustan Aeronautics Limited (HAL), kiba shna ïa ki helicopter kum ka Chetak bad kiwei kiwei ki don ka bynta khraw.
U Myntri u ong ruh ba da ki lak ngu tki nongtrei ha ki karkhana rit ki don bynta lang ha ka jingsuplai ïa ki jait tiar bapher bapher na bynta kitei ki projek.
Shuh shuh u ong ruh ba ka helicopter chetak kam dei satia tang ka mashin hynrei ka dei ruh ka bynta jong ka jingim kaba la shakri ïa ka Ri ha kine ki 60 snem tam.
U ong ruh ba kitei ki helicopter ym ba ki shakri ïa ka ri ha ka por thma hynrei ka don ka bynta kaba khraw ruh banleit ïarap ïa ki briew haba don ki jingjïa lyngshop mariang kylleng kylleng. Katkum ka jingong jong u, kitei ki jait helicopter ki la shakri borbah bha ha ka thma 1971.
Ha kane ka sngi, la donlang ruh ki heh shipai, u VR Chaudhuri kumjuh ki heh shipai kiba la don bynta ha ka jingshakri ïa kitei ki helicopter nalor kiwei kiwei.