Shillong, Iaiong 2: Ki samla Congress hapoh ka lama Meghalaya Pradesh Youth Congress (MPYC) lem bad ki Seng longkmie Mahila Congress ki la pynlong da ka jingïakhih pyrshah da kaba rah placard bad shong ha Congress Bhavan ban pyrshah ïa ka jingkiewdor palat pud ka Petrol,Diesel bad ki marbam mardih.
Ki samla bad ki longkmie jongka Congress ki pynpaw ba ka jingkiew dor ka Petrol, Diesel bad ka tyndong lyer shet jingshet kam don jingïadei ei ei ruh em bad kata ka thma Russia-Ukraine kumba la aidaw da u Symbud Myntri Rangbah ka jylla u bah Prestone Tynsong.
U Manuel Badwar, Secretary ba dei peit ïa ka Social Media jongka Congress u la ong ba ka sorkar jylla ka lah ban pynhiar sor ïa ka petrol bad diesel kumba ka ju leh ha ki por ba mynshwa. Ki bor synshar district ruh ki lah ban peitngor ïa ka jingkiewdor ki marbam mardih ym ban shu ai daw kumba la paw ha ki lad pathai khubor ba ka jingkiew dor ka dei namar ba ki trok kim ïoh rung shapoh ka nongbah ha ka por mynsngi. Kane ka dei tang ka nia kai suda, ong une u samla.
Ka sorkar ka dei ban siew jingïarap ïa ki nongtrei bylla sngi namar ka la dep lum bun bah ka khajna ( labour cess) namar nalor ba ki im kyndoi jakpoh mynta lei lei tang ban bam ruh kim ïoh bam shuh.Ka sorkar ka dei ban peit ba ki nongtrei ki dei ban ïoh ïa ki jingsiew jongki kham kloi ha kum kane ka por hiran.
“ Kata ka jingpynkhlaiñ seng kam naduh tynrai kaba la tip kum ka Prime Hub ka ïarap tang ïa kito ki nongsengkam ba la bit la biang ym ïa kiba duk ba kyrduh bad kane kam don jingkyntiew ei ei ruh ïaka ïoh ka kot” ong u Badwar.
U President ka MPYC u samla Adrian L Chyne Mylliem ula ong kane ka jingkiewdor ki umphniang kali ka la ktah jur ïa u duk kiba kyrduh bad ïa ki paidbah hi baroh ha ka jylla.
Ka president jong ka Mahila i kong Joplin Shylla i la ong ba kaba sngewsih ka long ba ki dor ki mur ha ka nongbah ka ïapher na kawei ka dong sha kawei pat ka dong bad ïa kane dei ban peit da ki bor synshar district.
