Shillong, Risaw 04 : Ka Meghalaya ka la jop ha ka jingïalehkai kaba laisien jong ka lympung ïalehkai cricket Women’s U-19 T20 Trophy da kaba pynliem da 50 ron ïa ka Sikkim ha ka jingïalehkai ha Hyderabad hynne ka sngi Ba-ar. Ha katei ka jingïalehkai ka Awesa G Momin ka khur marwei 4 wicket.
Ka Meghalaya kaba la jop ïa ka jingkynting pisa ka la kam ban tied nyngkong bad kamai 87 ron duh noh 9 wicket ha baroh ki 20 over, hashwa ba kan pynhap lut baroh ki wicket ka Sikkim kaba la kamai tang 37 ron ha ki 18.1 over na ka jingïalehkai jong ka Group B.
Ka Momin marwei ka khur 4 wicket ai kamai tang 1 ron ha ki 2.1 over. Ka Momin ka la ïoh ban pynhap ïa ka wicket jong ka Diksha kaba dei ka kapten jong ka Sikkim kaba la kamai bun ron da 11 ron.
Kiwei pat ki thei kawang bol ka Meghalaya kiba la khur takma ki kynthup ïa ka Neelam Roy (2/3), kaba la ïoh pynhap wicket ha ka jingkawang bol kaba nyngkong eh, ka Sara Daffica Kharbani (1/5), Sistilin Ryntathiang (1/9) bad ka Ankita Sharma (1/11).
Ha ka pali tied, ka Sharma ka kamai 32 ron na ki 37 bol hashwa ba kan hap wicket noh ha ka over kaba khadduh jong ka inning. Ha ka jingkamai ron lang ba 40 ron ryngkat ka Kharbani (9), ka la ïalam kamai ron ïa ka Meghalaya na ka 44 ron ha ka jingduh noh ba 6 wicket sha ka 84 ron duh noh 7 wicket.
Ka Meghalaya mynta kan pynkhreh pat ban ïakhun pyrshah ïa ka Karnataka ha ka sngi Palei.
