Shillong, Risaw 04 : Ka St Anthony’s Higher Secondary School kaba mihkhmat ïa ka jylla Meghalaya ha ka kyrdan ïalehkai U-17 ki shynrang ka la bteng khun nam jop ha ka lympung ïalehkai Subroto Cup da kaba pynliem da 4-0 kol pyrshah ïa ka Sainik School ha ka jingïalehkai hynne ka sngi Ba-ar.
Ka St Anthony’s Higher Secondary School ka la mad nam jop nyngkong ha ka sngi sdang kaba la long ha ka sngi Nyngkong da kaba pynliem da 4-0 kol pyrshah ïa ka Madhya Pradesh.
Ka Meghalaya ka la lah ban ïalehkai bha ha katei ka jingïakhun. U Badondor Marbaniang (33min), Rimankhraw Kharumnuid (58min), Jospal Kurbah (62min) bad u Chibaitki Pamthied (66min) ki rangïalehkai ba la thep kol na bynta ka Meghalaya.
Ka Meghalaya kan ïalehkai biang lashai ka sngi Balang kaba dei ruh ka jingïalehkai kaba khadduh na ka Pool H pyrshah ïa ka Goa.
