Shillong, Iaiong 1, 2022 : Ka khynnah skul jong ka Jawahar Navodaya Vidyalaya, Mawphlang kaba dang pule Class IX kaba kyrteng ka Shilla Bishnab kaba la shah jied ban mihkhmat ïa ka jylla ha ka prokram bad u Myntri Rangbah duh ka ri u Narendra Modi mynta ka sngi kaba la jer kyrteng ka Pariksha Pe Charcha (PPC) ka la buh jingkylli ïa u Myntri Rangbah duh ka ri halor ka National Education Policy kumno kan pynkup bor ïa ka imlang sahlang baroh bad khamtam ïa ki samla pule bad kumno kan prat lynti ïa ka Naya Bharat.
Haba jubab ïa kane u Myntri Rangbah duh ka ri, u Narendra Modi u la ong ïa kane ka khynnah skul na Meghalaya, ka Shilla Bishnab ha kaba ïadei bad ka National Education Policy (NEP) kumjuh ruh ïa Iwei i nonghikai na Haryana ruh u la buh kane kajuh ka jingkylli bad haba jubab ïa ki jingkylli, u Myntri Rangbah duh u la ong kadei ka ‘National’ Education Policy ym ka ‘New’ Education Policy. U la ong ba ïa ka policy la pynkhreh hadien ka jingïamir jingmut kaba bun bad ki briew bapher bapher ba don bynta ha kane. “Ka jingïamir jingmut na ka bynta ka National Education Policy ka la long kaba sani bha. La ïaphylliew jingmut halor kane bad ki briew ha kylleng ka ri,”
U Myntri Rangbah duh u la ong ruh ba la saiñdur ïa ka policy ym da ka sorkar hynrei da ki nongshong shnong, ki samla pule bad ki nonghikai na ka bynta ka roi ka par jong ka ri. U la bynrap shuh shuh ba ka NEP ka long ka kabu ïa ki briew ba kin bud ïa ka jingthrang lajong. U la ban halor ka jingdonkam ki sap treikam ryngkat bad ka jingtip. U la kdew ruh ïa ka jinglaitluid hapoh ka NEP ha ka jingjied ïa ki sobjek. U la ong ka jinglah ban pyntreikam bha ïa ka NEP kan plie ki lad ba thymmai bad u la kyntu ïa ki skul ha kylleng ka ri ban wad ki lad ba thymmai ban pyntreikam ïa ki teknoloji ba thymmai ba la shna da ki samla pule.
U Lat ka jylla Meghalaya, u Satya Pal Malik, ki samla pule bad ki nonghikai jong ka JNV Mawphlang ki la ïashim bynta ha ka prokram na Raj Bhawan ha nongbah Shillong. U Lat u la pynpaw ka jingsngewsarong jong u ha ka jingmihkhmat ïa ka jylla da ka samla pule jong ka JNV, ka Shilla Bishnab. “Nga sngewsarong ba ka samla pule na Meghalaya ka la ïoh ban ai ïa ka jingkylli jong ka sha u Myntri Rangbah duh ka ri. U Myntri Rangbah duh ruh u la jubab bha ïa ki jingkylli,” u la ong.
Ka nonghikai jong ka JNV, ka Priyanka ka la ong ba ka Pariksha Pe Charcha kadei ka lad kaba thymmai jong u Myntri Rangbah duh ban ïoh ïakren bad ki samla pule bad ïa ka jinglong ka pule puthi ha India. “Ka khynnah skul jong ngi ka la ïoh lad ban kylli jingkylli na u Myntri Rangbah duh. “Nga sngewkmen ban ïohi ïa kane. Nga sngew ba da kane ka rukom ki khynnah skul jong ngi kin don ka jingsngew shaniah skhem halade ha kaba ïadei bad ki eksam jong ki,” la ong ka nonghikai.
Ka Shilla Bishnab ka sngew ba ka long kaba donbok ba ka ïoh ban kylli jingkylli na u Myntri Rangbah duh ka ri, u Modi bad ka sngewhun ruh bad ka jubab ba ka la ïoh. “Ka long kaba sngewtynnad bad ka khyllipmat kaba kmen bha ïa nga. Ka jubab jong u ka long ba ki samla pule ki lah ban jied ïa la ka jong ka lynti kat kaba ki sngewtynnad ban jied bad ïa kaei kaba ki jied kin ïoh ban pyntbit bha,” la ong kane ka samla pule.
Ha ka bynta ba 5 jong ka Pariksha Pe Charcha, u Myntri Rangbah duh u la ïakren bad ki samla pule, ki nonghikai bad ki kmie ki kpa mynta ka sngi ha Talkatora Stadium ha New Delhi. U la jurip ïa ki exhibition jong ki samla pule ba la pyni ha katei ka jaka hashuwa ban sdang ka jingïakren. Ki Myntri Sorkar Pdeng u Dharmendra Pradhan, Annpurna Devi, Dr. Subhas Sarkar, Dr. Rajkumar Ranjan Singh bad Rajeev Chandrasekhar ryngkat bad kiba ïashim bynta lyngba ka bor internet kynthup ki Lat bad ki Myntri Rangbah, ki nonghikai, ki samla pule bad ki kmie ki kpa ki la ïadonlang ha kane ka prokram. U Myntri Rangbah duh u la kren bha ïa baroh ha kane ka rynsan.
Ha ka jingai jingkren ha ka jingïalang, u Myntri Rangbah duh u la pynpaw ka jingkmen jong u ban ïoh ïakren bad ki samla hadien ka jingïamir jingmut lyngba ka bor internet ha u snem ba ladep. U la ong ba ka PPC kadei ka prokram kaba sngewtynnad eh jong u. U la kren shaphang ka jingsdang ka Vikram Samvat new year lashai ka sngi bad u la ai khublei ruh ïa ki samla pule na ka bynta ki jinglehkmen ki ban wan. U Myntri Rangbah duh u la wanrah ïa ka rukom ba thymmai ha ka bynta ba 5 jong ka PPC. U la ong ba ki jingkylli kiba um lah ban shim yn sa ïakren lyngba ka video, audio lane text message ha ka Namo App.
