Kren shai ka Sorkar MDA bym lah ban kyntiew Deficit System ïa ki skul Adhoc

Shillong, ïaïong, 01: Ka Sorkar Meghalaya Democratic Alliance (MDA) ka la kren da kaba shai ba kan ym lah satia ban kyntiew kyrdan Deficit ïa ki skul Adhoc kiba don hapoh ka jylla Meghalaya baroh kawei.
U Myntri ka tnat Pule Puthi ka Sorkar Jylla u Bah Lahkmen Rymbui ha ka jingïakren bad u nongthoh khubor ha ka sngi Thohdieng u la ong, “ka Deficit System kan ym urlong daleilei ruh, kata ngan kren da kaba shai ba ka Sorkar Jylla kam don jingthmu ban pynrung Deficit System ïa ki skul Adhoc.”
“Nga la kren ruh hapoh ka Dorbar Mang Tyngka jong ka Iingdorbar Thawaiñ. Nga la batai shai ba ka Sorkar Jylla ka dang pynkhreh ban kheiñ ban diah haduh katno ka jinglut jingsep ha shi bnai bad haduh katno ka jinglut ha ka shi snem na ka bynta katno ban pynkiew tulop,” la ong u Bah Rymbui.
“Nga kyrpad ïa ki nonghikai jong ki skul Adhoc ba ki dei ban sngewthuh shai ïa kaei kaba ka Sorkar Jylla ka trei,” u la bynrap.
Dang ha u bnai Kyllalyngkot mynta u snem ki nongïalam jong ka Federation of All School Teachers of Meghalaya (FASToMO) ha ka jingïakynduh ïa u Secretary ka tnat Pule Puthi u Ambrose Ch. Marak, ki la tyrwa ban kyntiew kyrdan Deficit System ïa baroh ki skul Adhoc, hynrei na ka liang jong u Secretary ka tnat Pule Puthi u la kren shai ba ka Sorkar kan ym lah satia ban pynurlong ïa ka jingdawa na ka daw ba ka Sorkar Jylla ka don hapdeng ka jinghiran ka Pla Tyngka.
Ha kane ka jingïalang ki nongïalam ka FASToM ki la tyrwa ba lada ka Sorkar Jylla kam lah ban kyntiew kyrdan Deficit System ïa ki skul Adhoc ka la dei ban shu pynkiew noh da ka jingsiew tulop kaba T.18 hajar ka ban ïaryngkat lang kumjuh naduh Lower Primary haduh Higher Secondary.
Katkum ka jingai jingkheiñ jong ka tnat Pule Puthi, lada ka Sorkar Jylla kan ai jingmynjur ban kyntiew da T.18 hajar ïa ka tulop sha baroh ki nonghikai skul Adhoc naduh Lower Primary haduh Higher Secondary, ka jinglut kan long haduh T.13 klur antad ha ka shibnai bad T.156 klur ha ka shi snem.
Haduh mynta ki nonghikai skul Adhoc ki dang ïai bteng ïa ka jingïakhih da kaba shong kyllaiñ myngngor manla ka sngi hakhmat ka ophis treikam jong ka MBoSE ban dawa ïa ka Sorkar Jylla ba ka dei ban pynurlong noh ïa kane ka jingdawa.
Ha kaba ïadei bad ka jingdawa jong ki nonghikai skul SSA, u Bah Lahkmen Rymbui u la ïathuh ba ka Sorkar Jylla dang shen ha ka 27 tarik u bnai baladep ka la pyllait ïa ka pisa T.60 klur na ka bynta ban siew ïa ka tulop kaba ar bnai.
“Namarba nga khlem ïoh kylli shuh ha kine ki ar sngi lai sngi, nga tharai ba ka SEMAM ka ladep phah ïa kane ka pisa sha ki District khnang ban siew noh ïa ka tulop kaba ar bnai jong ki nonghikai skul SSA,” u la ong.
“Ïa kaba ngi la kular ban leh ngi la leh bad da kaba sngewburom ïa u Myntri Rangbah u Conrad Sangma, u la pyllait ïa ka pisa T. 60 klur ban siew (sha ki nonghikai skul SSA) ïa kaei kaba la kular,” u la ong.
Shuh shuh u la ïathuh ruh ba mynshi sngi ha ka por ba u dang don sha New Delhi, u la ïoh jingtip ba ka Sorkar India ka la pyllait ïa ka pisa sa T.68 klur sha ka Jylla Meghalaya.
“Nga kyrmen skhem ba ynda la poi sa kane ka pisa ngin sa lah ban siew dep ïa ka tulop kaba dang sah sa saw bnai sha ki nonghikai skul SSA,” la ïathuh u Bah Rymbui.