Shillong, Ïaïong 01: U Bah H. Brolding Nongsiej, Myntri ka tnad Water Resources jong ka sorkar jylla, u la ïathuh ba kane ka tnad treikam ka la ïoh ka pisa haduh 456 Klur tyngka na ka sorkar pdeng ban pyntrei ïa ki kam pynropi kiba bun ha kane ka jylla, khamtam eh na ka bynta ka rep ka riang.
Haba ïakren bad katto katne ki nongthoh khubor, u Bah Brol, uba la shimti shiteng aïom ïa kane ka tnad treikam na u Bah Metbah Lyngdoh, hadien ba u la shimti noh kum u Shongknor ka ïingdorbar Thawaiñ, u la ong ba îa kane ka pisa ba la ïoh na ka sorkar pdeng, yn pyntreikam na ka bynta ban pynpoi um sha ki lyngkha ki risai ha kylleng kylleng ki jaka jong ka jylla. “Kane ka jingïoh pisa na Delhi kan long ka jingïarap kaba khraw na ka bynta ki nongrep jong ki, khamtam eh sha kito ki lyngkha ki risai kiba duna ka jingpoi um”, u la ong.
U kyrmen ruh ba kane ka jingshna ïa ki jaka pynpoi um sha ki jaka rep kan kyntiew ïa ka rep ka riang, khamtam haba kane ka sorkar ba mynta ka pynleit jingmut bad shimkhia bha ïa ka rep ka riang.
Namar kane ka jingïoh ïa ka pisa kaba heh tam ban ïa kiwei pat ki snem sha ka tnad Water Resources, u Bah Nongsiej, u la ïathuh ba u Myntri Rangbah ka jylla, u Conrad Sangma bad kiwei kiwei pat ki para Myntri ki la wan khublei kyrpang ïa u.
