Ka sorkar synrop jong ka Meghalaya Democratic Alliance (MDA) ka la ïakhun tyngeh da ka thong ba kan lah ban pynkynriah noh ïa ki briew kiba sah ha Them Iewmawlong sha kawei ka jaka hynrei ym lah pat ban tip haduh katno katei ka kam kan urlong namar ym tip haduh katno ka kam kan ïaid stet ba yn lah ban pyndep noh thiaw ha shwa ka elekshon MLA kaban long ha u 2023.
Tad haduh mynta hi la ïohi ba ka jingïakren ka dang ïaid shaid shaid hapdeng ka High Level Committee jong ka sorkar jylla bad ki nongïalam jong ka Harijan Panchayat Committee na ka bynta ban pyntyllun ïa katei ka kam tangba ym pat ïohi dak ei ei haduh katno ka kam ka ïaid. Ka jingkynduh ha kane ka sngi Palei ruh kadei shi bynta jong katei ka jingïaid lynti tangba ym lah pat tip kaei ka jingmut jong ka HPC haba ïadei pat bad katei ka blueprint ba ka sorkar jylla ka pyni. Hato kum ka kynhun kin pdiang ne kyntait ïa katei ka jingtyrwa ba ka sorkar ka buh, kata ban pynkynriah noh ïa baroh 342 tylli ki longïing sha ka jaka ba don ka quarter jong ka Shillong Municipal Board.
Lehse dei tad ynda ka HPC ka la dep ban ïoh bad pule bniah ïa katei ka blueprint ba ka sorkar jylla kan ai lashai ka sngi, ka jingïakhun lehse kan kham shai la kan urlong lane kan sahteng biang. Ym lah ban len ba ka sorkar jylla ka la iakhun tyngeh bha ïa katei ka mat kaba la ktah bad pynlong ïa jan baroh ki nongshong shnong ka jylla ki la thrang la sliang ba dei ban pynurlong noh mardor khlem pynslem ne buhteng shuh. Lada na ka liang ka sorkar jylla hi ka lah ban pynurlong ïa kane, lehse kan ïoh ïa ka burom kaba khraw ym tang na ki paidbah ba kyrshan ïa ka sorkar hynrei wat na kito kiba ju bein ju khoh lane na ki kynhun liang pyrshah ruh.
Da kaba pynwandur malu mala ïa ka jingpynkhreh ka sorkar na ka bynta ban pynbiang jaka sah ïa kitei ki briew baroh 342 tylli ki longïing lehse kam dei satia ka kam kaba suk bad kam dei ruh ka kam kaba lah ban urlong noh tang ha i por iba lyngkot. Ka por ban pynbha, pynheh lane ban pynwandur ïa kitei ki ïing ban sah ma ki ruh kan shimpor bha lada jia ba kitei ki briew ki pdiang ban sah ha kitei ki jaka ba pynkhreh da ka sorkar. Haoid ym lah ban len ba lada ki pdiang ka la bha palat namar ka sorkar ka ïoh ruh ban pynstet ïa ka jingtreikam.
Ka shong eh ruh mynta ha ka rai ba ka Harijan Panchayat Committee kan shim hadien ba ki la ïoh pdiang ïa katei ka blueprint la shai ka sngi. Lada jia ba kam donshuh kano kano ka jingdawa bad ki la hun tang kattei kaba ka sorkar ka la buh hakhmat ka la dei ka jingjop ïa ka sorkar jylla hadien bun bnai ba ki la wad jaka kylleng kylleng ka sor Shillong. Ki don ruh ki khep ba ka sorkar jylla ka kynduh wat ïa ka jingkhih pyrshah na ki nongshong shnong hadien ba ki la bna ba ka sorkar ka khih pyrshah ban wanrah ïa kitei ki briew sha ki shnong ki thaw jong ki.
Ïa katei ka jingpyrshah la ïohi ruh dang shen da ka Dorbar Shnong Mawbah kaba la khih pyrshah ïa ka jingthmu jong ka sorkar jylla ban wan pynsah ïa kitei ki briew ha jaka jong ka RP Chest Hospital, Mawprem. Ka nongrim ba ka shnong ka pyrshah ka long ba nalor ba katei ka thain ka la khapngiah lypa kumta kan buh jingeh ïa ka thain bad kan pynlong shuh shuh ïa ka shnong ba kan nang khapngiah.
Dei hadien kane ba ka sorkar hadien ka jingkynduh ïa ki nongïalam shnong hapoh ka jingïalam jong u MLA ka thain Bah Mohendro Rapsang ba ka la mynjur ba kan wad jaka noh shawei bad jied da ka jaka ba don ka quarter jong ka Shillong Municipal Board. Ka don ka jingkyrmen ba katei ka jaka ba ka sorkar ka tyrwa na ka liang ka HPC ruh kan pdiang khnang ba ka sienjam ba la shim da ka sorkar naduh ba sdang kan long kaba seisoh.
