Phet noh u Nongkyrshan baradbah jong u Bah Prestone Tynsong

Shillong, Nailur 28: Uwei na ki nongkyrshan ba radbah jong u Bah Prestone Tynsong, uba ju khring ïa ki paidbah nongthep vote u la phet noh na ka Seng NPP. Une udei u Bah Anthony Kongwang na ka Shnong Kongwang.
U Bah Anthony uba long u nongrwai Khasi ba pawnam bha bad uba la ïakhun ruh ïa ka elekshon MDC ha ka snem 2014 ha ka por ba u Bah Prestone u dang don ha ka Seng Congress, u la phah ïa ka shithi iehnoh kam kum u Executive Member jong ka NPP Pynursla ha ka 26 tarik mynta u bnai.
U Bah Anthony udei uba ar napdeng ki nongkyrshan ba radbah jong u Bah Prestone, uba la phet noh shuwa ka elekshon MLA 2023. Uba nyngkong udei u Bah R. Monarch Shabong, uba la pynïasoh sha ka UDP.
Une u nongrwai u la pynpaw ba kadei namar ka daw shimet jong u ba u la iehnoh ïa u Myntri Rangbah Symnud jong ka jylla bad u National Vice President ka NPP.
Ym pat lah ban tip shano u Bah Anthony un pynïasoh, hynrei ki tyllong khubor ki ïathuh ba u lah ban pynïasoh noh sha ka Seng UDP.
Ki nongpeit pyrman elekshon ha Pynursla ki la pynpaw ba ka jingmih noh u Bah Anthony kan ktah jur ïa u Bah Prestone namar udei u rangbah uba la ju don ha syndah jong la bun bun snem naduh ka por ba u dang don ha ka Seng Congress. Nalorkara udei ruh u nongïalam jong ka thaiñ Riwar khappud uba ki paidbah ki la ithuh bad burom bha ïa u.