Ngin ieh ha ka mon u paid khappud ban rai la ki kwah don ha Meghalaya ne Assam : Dy CM

Shillong, Nailur 28 : U Deputy Chief Miniter Dy CM) ne u Symbud Myntri Rangbah ka jylla u bah Prestone Tynsong uba dei ruh u Chairperson ka Ri Bhoi Regional Committee u la kren shai ba kumba la kdew ha kawei na ki mat jongka jingïakren ba kin ieh ha ka mon u paid khappud ban rai la ki kwah ban don ha Meghalaya ne Assam kumta ruh ha kane ka kynti kin leh ïa kata da kaba kin ai lad beit ha ki paid khappud ban jied ha la ka mon jongki.
“ Kane kam dei tang kawei na ki kyndon hynrei ka dei ka jingthrang ruh jong ki ar Myntri Rangbah kata u Myntri Rangbah ka Assam u Himanta Biswa Sarma bad u Myntri Rangbah ka jylla Meghalaya u Conrad K Sangma ba kim kwah da lei lei ruh ban pynsngewsih ïa ki paid khappud kiba dei ki briew jong ngi hi kumta, ka Regional Committee mynta ka kynti ha ka jingleit jurip sha khappud kin ailad ïa ki paidbah ban jied ha la ka mon shano ki kwah ban don la ka long ha Meghalaya ne Assam” ong u bah Prestone Tynsong haba ïakren bad ki lad pathai khubor mynta ka janmiet Sngi Balang.
Nalor kane ula ong kumba ka Block I bad II kim dei kiba jaka ba ïakajia hynrei la pynïasoh ïa ki sha Karbi Anglong ha ka por ba ka Meghalaya ka hap sha Assam tang ban jan ka synshar khadar, kumta ha kane ka kynti ka jingïakren kan long ba ka Assam kan pynphai noh ïa kine ki jaka sha ka Meghalaya tangba hangne ruh kin ai lad ïa ki paidbah la ka dei ka ha Block I ruh kin jied la ki kwah ban wanphai sha Meghalaya ne ban don beit ha Assam bad kumjuh ruh ïa ka Block II ruh yn leh kumjuh.
Shwa ïa kane u Symbud Myntri Rangbah ula ïathuh ba ha kane ka kynti la kynthup ruh ïa ki District Council kata ha Khasi Hills la pynrung dkhot ha ki Regional Committee ïa u Dy CEM, EM Elaka ka KHADC bad ki MDC jong kito ki jaka khappud. Ha Jaintia Hills ruh ïa u CEM ka JHADC.
Ha kane ka kynti kaba nyngkong eh ka long ba ki dkhot ka Regional Committee kin ïakynduh shwa para ma ki ban ïakren kiei ki mat bad kumno ban pynïaid shakhmat ïa ka kam. Hadien kane yn sa lum ïa ki bor District Council, ki Syiem, ki Daloi, ki Rangbah Shnong bad lehse yn sa ïakren ruh sa mano mano ban dang ïakhot iawer sha ka jingiamir jingmut. Kumta kumba la paw ha kine ki khydiat por ba hadien ba la dep ïasoi ia ka MOU ki mih bun ki jingkynnoh bad jingpyrshah da kaba ong ba ki Regional Committee ki khlem ïamir jingmut bad ki bor synshar Hima bad synshar shnong katba ka jingshisha pat shwa ban pynïaid shakhmat la dep ïatai sani bha bad ki da ki dkhot ki Regional Committee bad ym don ka jingïaid lait ïa ki. Kumta ha kane ka kynti yn khot lut ïa baroh kiba ïadon bynta ha ka synshar ka khadar ban ïadon bynta lang ha kane ka jingïa pynbeit pud.
Halor ka jingkylli balei ba khlem kynthup ïa u CEM ka KHADC ha ki Regional Committee, u bah Prestone u la ong, ha Jaintia Hills ba don tang kawei ka Regional Committee ka suk ban kynthup lang ïa u CEM, hynrei hangne ha Khasi Hills ki don ar tylli kawei ha West Khasi Hills bad kawei ha Ri Bhoi kumta lehse kan eh ïa u CEM ban beh ha baroh ar ki Regional Committee kumta la rai ban kynthup noh da u Dy CEM ha ka West Khasi Hills bad ki MDC bad ïa u EM Elaka bad ki MDC pat ha Ri Bhoi District. Hynrei lada ka kam ka dawa bad i donkam ban kynthup dkhot ïa u CEM ka KHADC lah ban coopt ne pynrung dkhot ïa u kham hadien ruh.
Ki Regional Committee kin pan ruh ïa ki kot ki sla bad jingpynsabut kiba biang na ki bor synshar District Council, Hima, Elaka bad Shnong shwa ban ïa pynbeit bad ki Regional Committee jongka Assam ban leit jurip ha ki jaka ne shnong ba ïakajia. Ka jingïakren kan long beit da ka jingïasngewthuh jingmut lang na baroh arliang mamla.
Ha kaba iadei bad ka jingbuh por ïaki Regional Committee ban pyndep hapoh 45 sngi u la ong hooid ka jingbuh por ka long 45 sngi hynrei lah ban ym lah ban pyndep ruh namar ynda la ïakren lehse don ki khep ba ïa kajuh ka mat hap ban ia kynduh bunsien kumta ym pat nang ong ka lah ban kham shim por ruh ban pynkhreh ïa ka kaiphod na baroh arliang.
Khatduh eh u Symbud Myntri Rangbah u la ong ka jingsdang ban ïakynduh bad ïakren kan long hadien ka shuti Puja bad u kyrmen skhem ba kumba ka jingïakren bad ïa pynbeit ka long kaba sei soh ha ka bynta kaba nyngkong kumta ruh kane ka jingïakren ha kane ka bynta kaba ar ruh kan long kaba seisoh.
Ki jaka ban ïakren bad pynbeit ki long Langpih ha West Khasi Hills District; Borduar, Nongwah-Mawtamur, Deshdoomreah, Block-ll ha Ri-Bhoi District; Block-l, Psiar-Khanduli ha West Jaintia Hills District.
ïa ka Regional Committee ka ban peit ïa ka Ri Bhoi yn khlieh da u Symbud Myntri Rangbah bah Prestone Tynsong kum u Chairperson bad ki dkhot ki long ma Dasakhiatbha Lamare, Minister, i/cTransport, etc. – Member, bah Mayralborn Syiem, MLA, Nongpoh Constituency -bah
Jambor War, Executive Member, KHADC (Elaka) – Member bah Rangkynsai Kharbuki, MDC, Umroi, KHADC bad Deputy Commissioner, Ri-Bhoi District – Member Convenor.
ïa ka Regional Committee ban peit ïa ka jingpynbeit pud ha West Khasi HIlls la khlieh da u bah Renikton Lyngdoh Tongkhar Myntri ka tnad PHE kum u Chairperson bad ki dkhot ki long bah Macmillan Byrsat, MLA, Nongstoin Constituency – bah Kimfa S. Marbaniang, MLA, Rambrai – Jyngam Constituency bah Gigur Myrthong, Deputy CEM, KHADC -bah Bajop Pyngrope, MDC, Rambrai -Jyrngam, KHADC – bad Deputy Commissioner, West Khasi Hills District – Member Convenor.
ïa ka Regional Committee pat ka ban peit na ka bynta kane ka jingïapynbeit pud ha West Jaintia Hills yn khlieh da u ma Sniawbhalang Dhar myntri ka tnad Urban Affairs kum u Chairperson bad ki dkhot ki long ma Lahkmen Rymbui, Minister i/c Home, etc. – ma Comingone Ymbon, MLA,Raliang Constituency – ma Nujorki Sungoh, MLA, Mowkaiaw Constituency – ma Thombor Shiwat, CEM, JHADC bad Deputy Commissioner, West Jaintia Hills District – Member Convenor.