Shillong, ïaïong : U MLA ka Mawlai u Bah PT Sawkmie hynne ka sngi u la leit jurip ïa ka jaka ban shna ïa ka Primary Health Centre (PHC) ha Mawlai Mawtawar ha ka jingdon ryngkat u Dr. Aman War, Director ka DHS, ki doctor, u rangbah shnong bah Cornelius Kharkongor bad ki nongkitkam shnong.
Ha ba ai jingkren hadien ba la dep jurip u MLA u la pynpaw ba ka jingwan jong ki ban jngoh ka long ban pynurlong ïa ka jingkwah bad ka jingthrang jong ka shnong Mawtawar ban tei ïa ka PHC thymmai kaban long ka jingmyntoi kaba khraw ïa ka shnong Mawtawar bad ïa ki shnong bamarjan, kum ka Mawkynroh Umshing, Umshing Umjapung, Nongkohlew, Umsaw Mawjynrong bad kiwei.
U la pynpaw ruh ba ka jingbym don ka PHC, ki paidbah ki mad jingeh bha namar ka jingnang bun kiba wan shim dawai hapoh ka Sub Centre kaba don hapoh shnong Mawtawar bad ka Mawroh PHC kaba ju khmih baroh shikatta, ka ruh ka shem jingeh bha lang.Kum u MLA u la ong ba u la dep kren hapoh ka ïingdorbar thawaiñ ka ba dang kut shen shaphang ka jingdonkam PHC ha Mawlai Mawtawar bad na ka liang u Myntri sorkar ba khmih ïa ka Koit ka khiah ruh u la sngew bad shah shkor ïa kane.
Nalor kata u la pyntip ruh ba ka sorkar ka la mang kumba 158 klur na ka bynta ki jingtei kiba pher haba ïadei bad ka Koit ka Khiah hapoh ka jylla bad kane ka long ban kyntiew bad pynkhlaiñ ïa ki jingsumar ha ka jylla. U la ïathuh ruh ba kan lut kumba T.10 klur eiei na ka bynta ban tei ïa kane ka PHC bad kyrpad ïa ka shnong Mawtawar ba kan aiti noh ïa ka jaka sha ka tnad ba dei khmih, khnang ban ïoh ban sdang noh ïa ka jingtei. Ha kajuh ka por u la pyntip ruh ba shen kin sa shna pynheh bad pynbha ruh ïa ka Health & Wellness Centre, Mawta war Sub Centre, kaba la dep mang 18 lak bad kaba la dep pyllait ruh ïa ka work order na ka bynta ban sdang noh ïa ka kam.
Ha ka ba iadei bad ka um bam um dih ha Mawtwar ka ban wan lyngba ka JJM u MLA u pyntip ba shen kin sa buh mawnongrim noh haba ïa dei bad kane ka um ban sam man la ki thliew ïing, namarba u la dep ïakren ïa kane ka mat bad u myntri ba khmih ïa ka PHE.
Shuwa kane la ïoh ïa ka jingkren na u Dr. Aman War uba la pynpaw ba ki wan khnang ban ïoh pynurlong ïa ka jingang nud ba la slem bha jong ka shnong.Ha kane ka sngi la ïoh ruh ïa ka jingkren na u Rangbah shnong.
