Mawkyrwat, ‘Nailur, 28: Hadien ka jingjah rngai la saw sngi, ïoh ban sei noh ïa ka met jong uwei u rangbah uba la ngap jyllop na kaba leit khwai doh ha wah Phot-long-on, South West Khasi Hills District.
Katkum ka tyllong khubor ba la ïoh lum, la ong uwei u rangbah uba kyrteng u Syrpailang Sad, 22 snem karta uba na ka shnong Nongkdait Nongtwah, South West Khasi Hills District u ngap jyllop ha wah Phot-long-on naduh ka 21 tarik u ‘Nailur, 2022. “U Syrpailang Sad bad u Phailand Rngaid ki la mih na ïing ban leit khwai ha wah Phot-long-on ha ka sngi 21 tarik u ‘Nailur, 2022 namar ka jingjur jong u slap bad kim ïoh ban khwai bad ki la sah miet noh ha kane hi ka wah bad dei ha ka step jong ka 22 tarik u ‘Nailur, 2022 ki la sdang ban khwai lynti ban leit phai noh”, ong ka tyllong khubor.
Dei ha kajuh ka tarik ha ki por kumba por 9 baje ei ei u Syrpailang u la kum btuid bad hap hapoh um katba u samla Phailand Rngaid um lah shuh ban ïarap, u la mareh ban wan ïathuh briew noh ha shnong bad ki briew jong ka shnong tang mar ïa ïoh ïa kane ka jingtip ba la jia ki la phah pyrta shnong bad phah briew ban leit wat hynrei ha ka jingpyrshang ba nyngkong jong ki paidbah na shnong kim shym la lap ïa ka met jong u. Hynrei dei tad ha ka sngi jong ka 26 tarik u ‘Nailur, 2022 ha ki por kumba 2 baje ei ei lyngba ka jingtrei shitom jong ka Dorbar Shnong Nongkdait-Nongtwah bad ki para shnong ba marjan ryngkat ka SRT na Shillong bad South West Khasi Hills District ki la lap pat ïa ka met jong u na kawei ka khapmaw kaba u u la sah kut.
Halor kane ka jingjia, katkum ka jingong jong kiba ha ïing ha sem ba kim don kano kano ka jingtharai sniew hynrei ki ngeit ba dei ka jingbakla hi jong u namar katei ka wah kam long kaba shngaiñ ban leh klumar bad ka long kaba riat bad btuid bha ki maw. Shuh shuh halor kane kiba ha ïing ha sem kim shem buh kano kano ka jingujor pyrshah ïano ïano namar ki ngeit ba ka dei ka jingbakla jong u hi.
Ha kajuh ka por kiba ha ïing ha sem ki ai khublei ïa ki para shnong para thaw bad kumjuh ruh ïa ki SRT na Shillong bad South West Khasi Hills District kiba la ïa mih bad ïa trei shitom na ka bynta ka jingjia.
