Kynjoh ka ‘Nongkdait – Nongtwah IVCS Ltd’ïa u mawmer ka jingïaid lynti 5 snem

Mawkyrwat, ‘Nailur, 28: Ka Nongkdait – Nongtwah Integrated Village Co-operative Society Limited (N-NIVCSLtd) ha ka jingphuh jingphieng ka la ïoh ban rakhe ïa ka jingkynjoh ïa u mawmer jong ka jingdap san (5) snem ha ka jingïaid jong ka ban ai jingshakri ha ka imlang ka sahlang ha kaba ïa ka program la pynlong ha phyllaw jong ka Evergreen Lower Primary School, Nongkdait-Nongtwah, South West Khasi Hills District.
Ha kane ka sngi ba kyrpang u bah Pius Marweiñ, MLA/MDC jong ka Ranikor Constituency u la long kum u kongsan ha ryngkat ka jingïadonlang naduh u bah H.F. Pariat, General Manager RF Meghalaya Livelihoods and Access to Market Projects (MLAMP), Meghalaya Basin Management Agency (MBMA), u bah A. Suting, Deputy Project Director, Meghalaya Livelihoods and Access to Market Projects (MLAMP), Meghalaya Basin Management Agency (MBMA) lem bad kiwei kiwei de ki ophisar sorkar jong ka South West Khasi Hills District, ki longkpa longkmie, ki khun samla bad ki hep kiba rit jong ka shnong Nongkdait-Nongtwah.
U bah Pius Marweiñ, nongmihkhmat jong ka Ranikor Constituency haba kren kum u kongsan, u la ong ba kane ka sngi ka dei kum ka sngi ba kyrpang kum ka dak jong ka jingrakhe ïa ka sngi kha namar ka kynjoh ïa u mawmer jong ka jingdap 5 snem ka Nongkdait-Nongtwah IVCS ha ka jingïaid lynti ban pyntyllun ïa ki kam ha ka imlang ka sahlang bad hapoh shnong ‘poh thaw. U la ong ruh ba da ka jinglah jong ki ban pyntyllun ïa ki kam kiba bun, khamtam eh ban kynshew ïa ka pisa bad ban ai jingïarap lypa ka jingshim ram ka la long shisha ka jingkyrkhu ïa ki para shnong ki para thaw bad ka dei ruh ka bynta ban ai ka burom ïa ki nongïalam ba hakhmat jong kane ka Nongkdait-Nongtwah IVCS kiba la trei shitom met bad mynsiem ha ki por baroh.
Ha ka jingdon jong kane ka Nongkdait-Nongtwah IVCS ha ka kyrdan kaba ar hapoh ka Jylla bad kaba nyngkong hapoh jong ka South West Khasi Hills District, u bah Pius Marweiñ u la ai khublei kyrpang namar ka jingpoi jong ki ha kane ka kyrdan ka dei lyngba ka jinglah jong ki ban treikam bha ryngkat ka jinglongkawei bad long ryntih ha ki liang baroh. Shuh shuh ha kane ka jingkynjoh ïa ka jingdap 5 snem jong kane ka IVCS, u la ai ka jingkyrkhu kyrdoh bad kitbok kitrwiang ïa ka ba kan nang lah ban ïaid shaphrang ha ki sngi ki ban sa wan baroh. Ha kajuh ka por u la ai mynsiem ruh ba lyngba ka jingdon jong ka IVCS kan long ruh ka jingïarap ïa ki nongrep ba kin ïoh ban pynïaid ïew ïa ki mar rep jong ki bad ba kin nang ïoh mynsiem ban pyntyllun ïa kam rep kham shakhmat.
Haba kren halor ka dorkhas ba la ai da ka Nongkdait-Nongtwah IVCS lyngba u Secretary ka VLF, bah Pynshngaiñlang Syiemlieh, na ka liang u bah Pius Marweiñ u la ong ba mynta mynta um lah ban ai ka jingkular la un ïarap ne em ïa kane ka bynta, hynrei u buh tang kawei ka kyntien da kaba ong, “Nga sa pyrshang ban thaw ki lad ki lynti halor kane ka jingkyrpad namar ka por jong nga ruh ka la jan kut”.
U bah H.F. Pariat, General Manager RF MLAMP, Meghalaya Basin Management Agency (MBMA) u la ïathuh ka ‘Integrated Village Co-operative Society (IVCS)’ ka don tang hapoh jong ka Jylla Meghalaya bad ka long ruh ka jingsarong namar kiwei pat ki jylla ki la sdang ban wan wad jingtip ne wan peit thuh haduh katno ba kane ka IVCS ka treikam. U la pynkynmaw ruh ba ïa kane ka IVCS la sdang ha u snem 2016 – ’17 ei ei bad ha kaba sdang hi u la ïathuh ba ym pat lah ban tip haduh katno kan treikam, hynrei haba ïohi pat ïa kane ka IVCS hapoh Nongkdait-Nongtwah ka la long ka jingkmen bad jingkyrkhu kaba khraw haduh katta katta na ka bynta ki nongshong shnong ba tang hapoh san tylli ki snem ki la ïoh ban pyntyllun ïa shibun bah ki kam la ka long ha kaba ïa dei bad ka jingpynïaid ïew ïa ki mar ki mata ne wat ban pynlong ïa ka kum ka jaka pynlang pisa.
Ha kawei pat ka bynta, u bah H.F. Pariat u la ïathuh ba kane ka Nongkdait-Nongtwah IVCSLtd ka dei kawei na ki IVCS kaba wan ba ar (haduh u bnai Jylliew, 2022) napdeng ki 330 tylli ki IVCS kiba hapoh jong ka ‘Project Meghalaya Livelihoods & Access to Market Projects’ (MLAMP) kata 168 sha Garo Hills bad 162 sha Khasi, Jaiñtia bad Ri Bhoi. Ha kajuh ka por u la ai ruh ka jingïaroh ïa ka Nongkdait-Nongtwah IVCS kaba la ai ruh shibun ki jinghikai namar tang na ki 138 tylli ki longïing la lah ban ïoh haduh 400 ngut ki dkhot bad kane ka la long da shisha ka nuksa kaba khraw ïa kiwei de bad sa kawei dei ka nuksa ba bha ba hapoh ki 18 tylli ki C&RD Block kiba don hapoh jong ka Project MLAMP, kane ka Nongkdait-Nongtwah IVCS ka long kaba nyngkong ha ki rukom treikam.
U bah A. Suting, Deputy Project Director, MLAMP, Meghalaya Basin Management Agency (MBMA) u kren da kaba ong, “Ngim dei ban shu pan ap sah ïa ki jingmyntoi kiba wan na ka sorkar namar ka sorkar hi ka tip ïa la ka jong ka bynta ban ai ki lad jingïarap, hynrei kum ki paidbah nongshong shnong ki dei ban long bad sdang ban ïeng ha la ki jong ki kjat da kaba pyndonkam hok ïa ki kti ki kjat ban trei da ki kam la jong”. U ong ruh ba ha kine ki jaka jong ngi ngi don bun kyrhai ki spah mariang naduh ki jhur ki jhep, ka khyndew ban rep ban riang bad ki wah duid kiba khuid khlir khlir bad bun kyrhai ruh ka doh um doh wah, pynban kaba sngewsih ka long ba haba khwai na ki wah kiba don ha ki thaiñ ki ïoh da ka maruti, ka dohkha pat ïoh na Andra Pradesh bad kane ka la long kaei kaei kaba pynduh mynsiem bad mynta ka la dei ka por ban hikai bha na ka bynta ki khun ki kti jong kane ka pateng kaba mynta ba kin long ki briew kiba sdang ban pyrkhat thymmai da kaba sdang ban pyntyllun da ki kam la jong ym ban shu ap shah ïa ka jingpynbiang jong kiwei pat. Ïa kane ka bynta, u la ong ba ka la donkam ban hikai bha naduh dang rit, bad ka long ruh kaba donkam ba kum ki kmie ki kpa kim dei shuh ban shu hikai ïa ki khun ban nang ban stad tang ban wad kam sorkar hynrei ban hikai ruh ïa ki ba kin nang ruh ban ïeng ha la ki jong ki kjat.
U la ong shuh shuh ba mynta ka la dei ba por ban pynkylla noh ‘A un ïeng na ka bynta ka trei ka ktah, ‘B un ïeng na ka bynta ki lad jingkamai bad ‘C un ïeng na ka bynta ka jingpynïasoh ban ïatreilang’. Ha kajuh ka por u la ai ruh ka jingkyrmen ba lyngba ki lai tylli ki thong ba kane ka IVCS ka don kata ‘Shaniah’, ‘Kyrmen’ bad ‘Phyrnai’ kan sa lah ban pyntyllun ïa ki kam kiba bun ki ban sa long ki jingkyrkhu na ka bynta ki paidbah nongshong shnong.
Haba kren pynkut u la ong ba mynta ka long kaba donkam ba kum ki nongrep ki dei ban tip haei kin pynïaid ïew ïa ki mar jong ki namar lada kim lah ban leh kumta long leh nohei ki jingtrei shitom. Namarkata, ka long kaba donkam ba kum ki dkhot jong ka IVCS bad ki paidbah nongshong shnong ki dei ban don ka jingïatreilang ha ki liang baroh khnang ba ka jingthmu ban pynïaid shakhmat ïa ki kam kan long kaba ryntih bad long kaba jop.
Ïa ka khana lyngkot jong ka jingïaid lynti ka Nongkdait – Nongtwah Integrated Village Co-operative Society Limited (N-NIVCSLtd) la pule da u bah Markstarwell Langte, Secretary jong ka Nongkdait – Nongtwah IVCSLtd. La pynshit pynshngaiñ ïa kane ka program da ka jingrwai pdiang na ki samla jong ka Shnong Nongkdait-Nongtwah, ka Choreography na ki khynnah rit, ka jingrwai kyrpang na u bah Y. Khar-dewsaw bad ka jingshad tynrai na ki longkmie bad ka jingai sngewbha sha ki katto katne ki nong kynshew ba tista tam.