Lada ïa u Amit Paul phi kyrshan, hato ym lah ïa u doh u snam lajong: H. Lyngkhoi

Nongstoiñ, Nailur 28 : Ka Sur jong ki nong West ha ka sngi balang jong ka taiew, ka la pynlong ïa ka jingïalang ha sor Nongstoiñ ban pan jingkyrshan ïa ki paidbah ka West Khasi Hill District, kumjuh ïa ka jaidbynriew Hynñiewtrep ban noh jingïarap da ka pisa sha u Samla Hubert Paliar u samla na ka shnong Mawrok Mawliehbah, ha kaba utei u samla u don ka jingangnud ban leit ban ïakhun ha ka lympung International Arm Wrestling 2022 ka ban long ha Turkey ha u bnai Risaw.
Une u samla un mih khmat ïa ka Ri India kumjuh ïa ka jaidbynriew Hynñiewtrep, hynrei kumba long mynta utei u Samla u ba wan na ka longïing kaba duk, kumta um lah ban kyrshan nalade ban leit sha katei ka lympung ïalehkai. Kumta ka Sur jong ki nong West ka kyrpad sha baroh ki paidbah ban ai jingkyrshan lem ïa utei u Samla.
Ha ka jingïalang kaba la long ha sor Nongstoiñ, u Samla D.Sun Chairman jong ka Sur ki nong West u la pynïaid ïa ka jingïalang bad la ïoh ka jingduwai na uwei na ki rangbah jong ka thaiñ u Bah Arful Kharbani. Katba na ka liang u Samla Hamar Lyngkhoi uwei na ki samla rangbah haba ai jingkren u la ong, “Ha ki snem kiba la leit phi la kloi ban noh jingïarap ïa u Amit Paul, hato kan eh aiu ba phin ïarap lem ïa une u Samla. Namarkata ka dei ka kamram bad ka jingkitkhlieh jong baroh ban noh synñiang lem sha une u samla jong ka dong ka thaiñ bad ka jaidbynriew”.
“Hato ngi hun mo ban shu peit ïa une u Samla khlem da ïoh ban leit sha katei ka lympung ïalehkai tang namar u wan na ka longing ba duk. Lada ma nga bad ma phi ngim kyrshan lem ïa kum kine, ka pynlong ïa kiwei ki Samla jong ka jaidbynriew ba kin duh jingkyrmen ha ka jingïalehkai hadien habud. Kumta ka jingïasnohkti jong phi kaba rit ruh kan long ka jingmyntoi ïa une u Samla”, u la ong
U Samla Wanteibok Lyngdoh Secretary ka Sur jong ki nong West u la ong, “Ngi kum ka dong ka thaiñ ngi sngew kmen mynta ba kum ka dong ka thaiñ la mih u samla ba wanrah burom ïa ka thaiñ. Kumta ngi la kyrpad ïa baroh naduh ki longkmie ki longkpa ki khun samla jong ka dong ka thaiñ, kumjuh jong ka jaidbynriew ban ïarap lem ïa une u Samla u ba wan na ka longïing kaba duk”.
Ha kajuh ka por u la ther ïa ka sorkar ba balei ka pynslem ban pyntrei ïa ka Sports Policy hapoh ka jylla. “Kane ka jingpynslem ka wanrah ka jingeh ïa kiba bun ki Samla jong ka jaidbynriew kong ngi khamtam ki longïing kiba duk kum jong u Samla Hubert Paliar. Lada lah pyntreikam ïa kane ka policy, kan ai jingmyntoi shibun ïa ki nongïalehkai kiba thrang ban poi sha ka thong. Ngi kyntu jur ïa ki nongmihkhmat, ki seng mon sngewbha bapher ba kin sngewbha ban mih shakhmat, ban ïarap ïa une u samla”.
Hadien kane la ïoh ka jingkren ruh na kiba haïing hasem jong une u Samla. Na ka liang ka Sur jong ki nong West kan pynlong biang sa ha iew Rambrai ha ka 29 tarik mynta u bnai bad 30 tarik ha iew Riangdo. Kumta ka Sur jong ki nong West ka kyrpad biang sa shisien ban ïarap lem ïa utei u Samla bad kino kino kiba kwah ban ïarap ïa utei u samla, kin sngewbha ban ïakynduh ïa ki nongïalam jong ka Sur ki nong West.