Ka Them Metor ka jaka bala ithuh kum ka slum bah jong ka Nongbah Shillong, ka dei ka jaka kaba buhai shnong da ki paid Harrijan kiba trei kum ki nongsar surok, ki nongleit lum jakhlia na ki Iingbriew bad ter ter naduh ka por jong ka jingsynshar ka Bilat. Hynrei hadien ka jinglaitluid jong ka Ri India bad ka jingioh ka Meghalaya iala ka jong ka Jylla, ka Shillong Municipal Board kala shimwai ia kane ka jaka ban pynshongshnong tang ia la ki jong ki Nongtrei haba ithuh ruh ia kiwei kiwei kum ki nongshongshnong ba be-aiñ.
Ka Sorkar naduh ki snem 1980 ter ter, kala ithuh ia ka Them Metor kum ka slum colony ba be-aiñ (illegal slum colony) bad kala pynmih ruh ia ka hukum ban kyndang ia ki briew ba shong be-aiñ The Meghalaya Public Premises (Eviction of Unauthorised Occupants) Act, 1980 hynrei ia kane ka hukum la pynsangeh da ka Iingkashari Guwahati High Court ha u snem 1986 da ka jingleit mudui jong ki Harijan kiba ieng pyrshah ia ki bor sorkar.
Ka Them Metor ka dei ka ishu kaba la iakhih da ki trai ri trai muluk ban weng noh na Them Iew Mawlong naduh ki snem 1970 ter ter haba kynnoh ruh ba kane ka jaka kala kylla long ka ktem ki riew sniew, ki Nonglute, ki Nongtuh Nongthiem, ki nongleh bymman bad ki briew kiba pyndik ia ka leit ka wan, ka khaii ka pateng bad ka kamai jakpoh jong kiba balang khamtam ki paid Khasi kiba shah thombor na ka por sha ka por. Hynrei ka jingiakhih jong u snem 2018 ka dei kaba la jur thikna bad kane ka jingiakhih kala pynkylla madan thma ia ka thaiñ Motphran bad ki shnong ba marjan namar ka jingjia ba shah thombor ki paid Khasi ha ki Harijan ka Them Metor.
Kane ka jingiakhih kala pynkhie im ïa ka mynsiem ieid Ri, Ieid Jaidbynriew jong ki Khun Khasi Khara ka Bri u Hynniewtrep bad kane ka mynsiem ieid ri kala paw shai kdar ha ki samla shynrang bad kynthei kiba la mih paidbah ban ïakhun pyrshah ïa ka jingshah thombor, jingshah iuhroit bad jingshah leh kheiñ poh kum ka Jaidbynriew hakhmat kiwei pat ki Jaidbynriew heh paid. Ka mynsiem ba shynrang bad ba satar jong ki Khun Khasi Khara ka dei ruh ka dak ban pyni sha ki Bor Synshar ba kim dei shuh ban shu leh khun jakai ïa u paidbah, ym dei shuh ka por ban shu ïa pynthame da ki buit bapher bapher hynrei ban pyni beit da ka kam kat kum ka jingkwah u paidbah .
Ka Sorkar Jylla bala synshar da ka kynhun synrop Meghalaya Democratic Alliance (MDA) kala shimkhia bha ia kane ka jingdawa u paidbah ba kala thung ia ka High Level Committee ban wad ia ka lad ki lynti ha kaban lah pynkynriah noh ia ka Them Metor na Them Iew Mawlong. Da ki jingai jingmut jong kane ka Committee, ka Sorkar kala thied duh syndon ia ka jaka ha Them Metor na ka Hima Mylliem ha ka dor ba T. 2 klur bad kala pyniaid shakhmat ia ka kam ba iadei bad ka jingpynkynriah ia ki Nongtrei ka Shillong Municipal Board bad jong kiwei kiwei ki Tnad Sorkar kiba sah ha kane ka jaka.
Ki Trai shnong ka Jylla ki ap mynta satang lano ba ka Sorkar kan pynkynriah noh iala ki jong ki Nongtrei na Them Metor bad ban kyndang ia ki nongshong be-aiñ na ka jaka Sorkar kat kum ka The Meghalaya Public Premises (Eviction of Unauthorised Occupants) Act, 1980, kaba dei ka aiñ ban kyndang ia ki nongshong shnong be-aiñ ha ki jaka Sorkar.
Hynrei ka jingkylli mynta ka mih hadien ba ki paid Harijan na Them Metor kila kwah ban iakren bad ka Sorkar Jylla ba kan ai jaka bujli ha kaban pynkynriah ia ka Them Metor na Them Iew Mawlong. Ka jingkylli ka long ba hato ka Sorkar kan sngap bad ai jingmynjur ia kane ka jingkyrpad jong ki Harijan kiba shu shong shnong be-aiñ ha kane ka jaka da ki phew phew snem ne kan shu kyndang beit da ka bor kat kum ka aiñ kaba treikam hapoh ka Jylla.
Ka long shisha kaba sngewpap ban shu pynkylla phetwir ia ki longiing longsem da kaba kyndang jubor ia ki na ka jaka ba kila sah da ki phew phew snem hynrei haba kut hi, ka aiñ ka dei ka aiñ bad kam ju don satia ka jingsngew isynei ne sngew sangsot ia ki nongpynkheiñ aiñ. Ki Nongshongshnong ba burom aiñ jong ka Sorkar ki don da ki lak ngut kiba khlem iing khlem sem, khlem ki jaka puta, hato mano ba don hok ban ioh jaka ei na ka Sorkar…ki riew pynkheiñ aiñ ne kiba burom aiñ.
Kam long satia ka kam kaba suk ia ka Sorkar Jylla ba kan pynkynriah ia ka Them Metor sha kiwei pat ki jaka bad kam dei ruh kaba suk ba ka Sorkar kan shu shim rai khlem ka jingiasyllok lang jong ki kynhun bapher bapher lane khlem da thew da ka tarujur ba kan nym noh shiliang lem kumta ka Jylla ka lah ban mad biang ia ka jingbym shongsuk shongsaiñ.
Baroh ki khmat mynta ki phai sha ka Sorkar Meghalaya Democratic Alliance ba kumno ban leh bad kaei ka sienjam ba kan shim halor kane ka kam.
