Smai 5000 ngut ki Doktor ban ai jingpynshai halor ka jingsangeh treikam kynsan u klongsnam

Shillong, Nailur 27: Ki 5,000 ngut ki doktor hapoh ka shatri jong ka Cardiological Society of India(CSI) kaba dei ka kynhun jong ki doktor ba sumar ïa ka jingpang klongsnam ha ka sngi Ba-ar ki la shim ïa ka jingkhlei jubanlak ban pynshai paidbah ïa ka jingïap na ka jingpang sahngeh klongsnam {Sudden Cardiac Death (SCD)} bad ki lad jingïada ban lait na ka jingïap na ka daw kane ka jingpang.
Na ka liang kine ki doktor ki la rai ba ha ka 29 tarik Nailur kin sa sdang ïa ka jingpynshai paidbah ïa ki lad ki lynti ban ïada ïa kane ka jingpang khnang ban lah ban pynlait im ïa kiba bun bah ki paidbah namar kane ka jigpang ka lah ban dkhat tang hadien katto kattne kynta hadien ba ka kurup lada ym tip ïa ki lad ai jingsumar kyrkieh.
Katkum u Dr Debabrata Roy, Honorary General Secretary, jong ka CSI uba dei ruh u Senior Consulting Interventional Cardiologist ka jingkiew kiba ïoh ïa ka Coronary Artery Disease (CAD) ki nangkiew kat nangmih ki sngi bad lada ym lah ban shim ki lad jingïada ka jingbthei kynsan ka jingpang sahngeh klongsnam ha kano ma kano ka por.
Shuh shuh u Dr PS Banerjee, President, CSI u la ong ba ha ka ri kumba 53 ngut na man ka shilak ki ïap na ka daw kane ka jingpang.
Na ka liang ka CSI ka buh ïa ka thong ba naduh ka 29 Nailur kaba dei ka sngi rakhe ïa ka World Heart Day na ka liang ka CSI kan pynshai sha ki 10 lak ngut ki paidbah shaphang ka jingma na kane ka jingpang. Ka CSI ha kine ki laibnai ban wan kan pynlong ruh ki jinghikai kumno ban ïada na ka jingïap haba don kiba ïoh ïa kane ka jingpang.