Shillong, Nailur 27: U Sanjay Goyal, IAS, uba la bat teng kum u DC jong ka West Garo Hills bad East Khasi Hills, un shimti noh kum u Chairman cum Managing Director (CMD) jong ka tnad MeECL.
U Goyal uba long ruh ophisar IAS jong ka 2004 Batch, u la wanphai na ka jingleit trei kum u ophisar ka sorkar India ne kata ka Inter State Deputation.
Nalor u CMD jong ka MeECL, u Goyal un long ruh u hehduh jong ki lai tylli kiwei pat ki bor treikam kiba ïadei bad ka kam bording bad kine ki long ka Meghalaya Power Generation Corporation Limited, nangta ka Meghalaya Power Transmission Corporation Limited bad ka Meghalaya Power Distribution Corporation Limited.
Ïa uwei pat u ophisar IAS, u P. Shakil Ahmmed, la knieh noh ïa ka kam Principal Secretary to the Government of Meghalaya Power Dept, Fisheries Dept bad kiwei kiwei, namar ka jingwan shimti u Sanjay Goyal.
Une u ophisar ba la wanphai un bat ruh kum u Commissioner & Secretary to the Government of Meghalaya ïa ka Revenue and Disaster Management Department, bad un long ruh u Chairman jong ka Board of Revenue.
I Kong R. Lyngdoh, IAS i la shah knieh noh ka Revenue and Disaster Management Department bad in bat noh kum ka Commissioner & Secretary to the Government of Meghalaya jong ka tnad PWD.
I Kong RM Kurbah, IAS, iba long ka Secretary to the Government of Meghalaya Health and Family Welfare la tynrong shuh sa ka kam Director of School Education and Literacy bad in bat ruh kum ka State Director jong ka Sarva Shisha Abhiyan.
Katba ïa u Ambrose Ch. Marak, IAS uba ju bat kum u kam Director of School Education and Literacy la knieh noh na u bad un bat noh kum u Chairman jong ka Meghalaya Board of School Education (MBoSE).
Kane ka long katkum ka jingpynbna paidbah mynta ka sngi ba la pynmih da u Bah CVD Diengdoh, IAS uba long u Secretary to the Government of Meghalaya, Personel & AR (A) Department.
