Shillong, Nailur 26 : U Myntri Rangbah ka jylla u Conrad K Sangma u la ong ba un ïakren bad ka sorkar pdeng halor ka jingpynduh ïa ki hok ba kyrpang ba ki ophisar All India Services (AIS) na kane ka thaiñ ki dei ban ïoh.
“ Khlem pep ngan shim khia ïa kane ka kam ban ïakren bad ka sorkar pdeng” ong u Myntri Rangbah.
Ka sorkar pdeng ka la pynduh ïa ki jingsiew ba kyrpang ba ki ophisar IAS, IPS, IFS na ka Assam-Meghalaya, Sikkim, Nagaland, Tripura, Manipur Cadre ki ju ïoh . Kine ki ju ïoh ïa ka special allowance kaba 25 % na ka basic pay scale jongki bad ki don ruh sa kiwei kiwei ki jingïoh ba ki ju ïoh hynrei mynta la pynduh noh.
ïa kine ki jingsiew ba kyrpang ïaki ophisar na kane ka thaiñ la sdang ha u 2009 hynrei mynta la pynduh noh da kane ka sorkar NDA. Ka Department of Personnel and Training (DOPT) ka la pynmih ïa kane ka hukum ha ka Sngi Thohdieng ba la dep ba ïa kine ki jingsiew ba ju siew sha ki opisar IAS, IPS, IFS na kane ka thaiñ la pynduh noh nangne shakhmat.
Nalor kane ïa ka pisa ba kyrpang ba ki ju ïoh ha ka por ba ki shongthait ne ka Post Requirement Housing Facility ruh pynduh noh.
