Manla ki thliewïing ha Jowai ki dei ban don ki Septic Tanks

Jowai, Nailur 27: U Chief Secretary jong ka sorkar jylla u bah D.P. Wahlang, IAS, mynta ka sngi 27 tarik ula wan hair sha nongbah Jowai ban lum ïa ka jingïalang (review meeting) ha Conference Hall jong ka ophis u Deputy Commissioner, West Jaiñtia Hills District, Jowai.
Ha kane ka jingïalang la ïadonlang naduh u bah M.R. Synrem, IAS, Commissioner and Secretary, Urban Affairs Department, bah E. Kharmalki, IAS, Director, Urban Affairs Department, u bah B.S. Sohliya, IAS, Deputy Commissioner, West Jaiñtia Hills District, u R.S. Gill, IFS, Principal Chief Conservator of Forest and Chairman, MSPCB, lem bad kiwei de ki ophisar sorkar.
La pynlong ïa kane ka jingïalang shi bynta ban ïakren ha kaba ïadei bad ka hukum jong ka National Green Tribunal (NGT) katkum ka O.A. 172/2016/EZ bala dep ujor pyrshah ïa ka sorkar Meghalaya da uwei na ki nongshong shnong ka Jowai u ma Sajay Laloo.
Na ka liang u Chief Secretary ka jylla uba kyntu ïa ki bor District kumjuh ïa ka Jowai Municipal Board bad ka Urban Affairs Department ba kin jurip bniah ïa kane ka hukum katkum ki kyndon jong ka NGT, kaba ïadei bad ka jingkhuid jingsuba jong ka wah Myntdu River bad ban pyntikna ïa ka jaka theh ñiut ba paka na ka bynta ka sor Jowai.
La khang pyrshah ba ym dei ban don kino kino ki jingtei hapoh ka 50 meter ka jingjngai na ka Wah Muntdu bad dei ban pynduh pyndam noh shi syndon ïa ki. Ha ka juh ka por ula kyntu ban jurip bniah ba ki jakhlia kim dei ban ïohlad ban tuid sha ki bynta ka wah bad kumjuh ruh ka jingpyntrei ïa ka Faecal Sludge and Septage Management Treatment Plant, la pyntip ruh baroh ki thliewïing hapoh ka sor Jowai ki dei ban don ïa ki septic tanks kiba biang.