Nongstoiñ, Nailur 27: Haba kylli la ka sorkar kan pynurlong ne em ïa ka 35 kilometer ka surok ban pynpoi naduh Nongstoiñ sha Maweit kaba ki paidbah ki la angnud baroh shikatta, na ka liang u Bah Gigur Myrthong MLA Mawshynrut, u la ong ba ka shong ha ka jingstad jong ki paidbah ka thaiñ Maweit bad lada ki ailad ba un wan biang ha ka bor. Lada ki ailad te ym don jingartatien ba katei ka surok kan urlong.
U la pynpaw ruh ba kum u nongmihkhmat, um shym la iehbeiñ ïa ka thaiñ Maweit kumba ka la shah iehbeiñ baroh shikatta. Hynrei u la pyrshang katba lah la i bor ban pynpoi ïa ki scheme sha baroh ki shnong hapoh katei ka thaiñ.
U la ong ruh ba u Myntri Rangbah ka sorkar jylla u Conrak K. Sangma ha ryngkat u Symbud Myntri Rangbah u ba khmih ruh ïa ka tnad PWD, u Bah Prestone Tynsong, kin hiar sha Maweit ha ka 30 tarik u Nailur 2022 na ka bynta ban leit plie ïa u maw nongrim ban shna noh ïa ka surok Nongstoiñ-Maweit kaba 23 kilometer ïa kaba la mang tyngka haduh 98 klur ram.
U Bah Gigur Myrthong MLA ka thaiñ, u la kyntu ïa ki paidbah nongshong shnong jong ka thaiñ Maweit, ba kin wan sha katei ka jingïalang plie maw nongrim, kum ka dak ka jingsngew burom ïa u Myntri Rangbah bad Symbud Myntri Rangbah, kiba la lah ban pynurlong ïa katei ka surok kaba la shah iehbeiñ mynta la palat 50 snem.
