Shillong, Ïaïong 01: Ka Myntdu Lions kala bteng biang ban khur nam jop ha ka sien ba ar ha ka lympung ïalehkai Senior Men Challengers Cup ba pynïaid da ka Meghalaya Cricket Association (MCA) hadien ba kala pynliem noh da phr awicket pyrshah ïa ka Symper Panthers ha ka jingïakhun ha ka sngi Thohdieng ha madan Polo, Shillong.
Haba phai sha ka jingïalehkai hapdeng kine ki ar tylli ki team la hap ban pynïalehkai ha ka por 2 baje janmiet na ka daw ka jingpynthut u slap ba jur ha ka por mynstep ha kaba la pynduna noh sha ka 16 over shilliang.
Hadien ba la jop ïa ka jingkynting pisa, u kapten jong ka Myntdu u Dippu Ch Sangma u la rai ban ap bol bad ka kynhun jong u kala pynliem ïa baroh ki wicket jong ka Panthers kaba kamai tang 99 ron ha ki 15.1 over. Ka Lions kala lah da kaba suk ban kynjoh sha katei ka thong tang ha ki 12.4 over bad duh noh tang ar wicket. Kane kadei ruh ka sien kaba ar ba ka Symper Panthers kala mad ïa ka nam rem.
U kapten jong ka Symper u Kishan Lyngdoh u la sdang ban ïalam ïa ka kynhun da kaba lah ban kamai ron bun hynrei u la shah pynkhyllem wicket noh ha u rangkawang bol spin u Aryan Bora (1/16) bad kamai kynjoh tang sha ka 24 ron. U rangtied ba kham kamai bun ron tam na bynta ka Panthers udei u Babloo Passah, uba khyrwit hynriew tylli ki four ha ka inning bad kamai 34 ron hynrei u la shah pynhap wicket noh da ka run out.
U Dippu uba la pynhap ïa ka wicket u Passah, u la lah ban kawang bol bha ha kaba u la khur 4 wicket ai kamai 16 ron, ba kynthup ïa lai tylli ki wicket ba u ïoh ha ka shi over. U Chengkam Sangma u ïoh 2 wicket ai kamai 18 ron bad u Riboklang Hynniewta u ïoh 1 wicket ai kamai 22 ron.
Ka Myntdu kala sdang ban ïalehkai bha haba beh ïa katei ka ron, ha kaba u Rohit Shah blazing u kamai marwei 51 ron na ki 32 bol bad neh haduh kaba kut jong ka jingïalehkai. U la ïarap ïa ka Lions ban kyntiew ïa ka jingkamai ron ha ki hynriew over, watla u la duh noh ki arngut ki nongtied ba mih madan lang ha ka kti jong u Kishan (2/22). U Rohit Rai u kamai 19 ron bad u Hynniewta u kamai 21 ron (not out), bad ka Myntdu ka dang donkam kamai ron da kaba shanñiah ha u Shah.
Na bynta ka jingkamai half-century bad ïoh kem lai tylli kum u rangpa wicket, u Shah u la ïoh khur ïa ka khusnam Player-of-the-match. Ka jingïalehkai mynta ka sngi Saitjaiñ kan long hapdeng ka Umiam Eagles pyrshah ïa ka Nokrek Tigers ha ka por 9 baje mynstep.
