Phah jingthoh ka KSU sha ka DC halor ki jingeh ba ïadei bad ki nongïalehkai napoh ka distrik ki ïa kynduh

Mawkyrwat, ‘Nailur 26: Ka Khasi Students’ Union (KSU) jong ka South West Khasi Hills District da ka mynsiem jong ka jingsngewkhia bad don ka jingkitkhlieh na ka bynta ki para samla jong ka dong ka thaiñ kiba don ka sap ha kiba bun ki jait jingïalehkai bad kiba la ïoh ban mihkhmat sha kiwei de ki jaka, mynta ka sngi ki la leit ban ïa kynduh ïa ka Deputy Commissioner, South West Khasi Hills District ryngkat ka jingthoh ban pynsngew ha ka halor ki katto katne ki jingeh ba ki ki ïa kynduh.
Ha kawei pat ka liang, ka Khasi Students’ Union (KSU) jong ka South West Khasi Hills District da ka jingsngewkmen hadien ba ka la ïohi ba ki samla shynrang bad kynthei napoh ka South West Khasi Hills District ki la nangkiew khamtam ha ki lympung ïalehkai bapher bapher bad bun na ki ki la shah jied ban mihkhmat ïa ka Jylla bad don ruh napdeng jong ki kiba la mihkhmat wat ïa ka Ri India sha bar ri, pynban ha kawei pat ka liang ka long kaei kaei kaba sngewsih namar ka jingduna ki lad jingïarap na ka liang jong ka sorkar.
Ha kawei pat ka liang ka seng ka pynpaw jingsngewkhia ruh bad kam lah ban len ba ka long ruh ka jingpynduh mynsiem kaba khraw ïa ki samla ïalehkai namar ka jingduna ki lad ai jingïarap ïa ki lyngba ka sorkar, haba ki mih ban leit ïashimbynta sha bar jylla bad shabar ri. Kum ka seng, haba ka ïohi ba kane ka jingduna ka lah ban ong ba ka dei kawei ka jingkhanglad ïa ki ba kin kiew shaphrang ban pyni bad pynjanai ïa ka sap ba ki don khamtam haba kiba bun na ki kim dei kiba mih na ki longïing ba don ba em.
“Hadien ba kiba bun ki samla napoh ka South West Khasi Hills District kiba leit mih khmat ïa ka ka Jylla bad ka Ri India ha ki lympung ïalehkai sport bapher bapher ki la ju wan sha ka miej jong ka seng ban ïathuh ban pynpaw ïa ki jingeh bad ruh ban pan jingïarap ruh shwa ba kin leit ïalehkai”, ong ka kyrwoh na ka seng. Kumta na ka liang ka KSU, South West Khasi Hills District lyngba kane ka pynsngew ha khmat jong ka Deputy Commissioner, South West Khasi Hills District ba kan sngewbha ban thaw ki lad ki lynti ban jied bad pynïoh ïa ka bai bam (Sports Scholarship) ïa ki samla donsap kiba don ka lawei lyngba ka District Sports Promotion Society Programme (DSPS) ne lyngba kiwei kiwei ki lad ai jingïarap khnang ba ki samla kin ïoh mynsiem bad kin nym sngewmarwei ne shem jingeh haba ki pynjanai ïa ka sap ba ki don bad haba ki leit ban mihkhmat ha kino kino ki lympung ïalehkai nangne shakhmat.
Ha kane ka jingleit ïa kynduh ïa ka Deputy Commissioner, South West Khasi Hills District la synrang lang naduh u Forwardman Nongrem, President KSU South West Khasi Hills District, u Pauldeep Tongwah, President ka KSU Mawkyrwat Circle, u Plosborlin Kharjahrin, u Environment Secretary jong ka KSU South West Khasi Hills District lem bad kiwei de ki dkhot jong ka seng.