“Ban ïoh khur takma ngin kham pynleit jingmut noh ha ki jait jingïalehkai kiba kham paw: CM

Shillong, Nailur 26 : U Myntri Rangbah ka jylla u Conrad K Sangma u la ong ba mynta ka sorkar kan kham pynleit jingmut noh ha ki jingïalehkai kiba kham paw khnang ba ka jylla kan ïoh khur takma ha ki jingïalehkai National bad kiwei kiwei ki lympung.
Ïa kane u Myntri Rangbah u la ong haba kren kum u kongsan ha ka sngi Nyngkong ha ka jingplie pyrda ïa ka lympung ïalehkai 2nd Northeast Olympic Games 2022 kaban sa pynlong ha kane ka jylla kaban sdang naduh ka 10 tarik haduh ka 16 tarik u Naiwieng 2022.
“Ka long kaba donkam ïangi ban kham pynleit jingmut noh ha ki jingïalehkai kiba ngi kham paw kumba leh da ka Manipur bad Haryana kiba la jied ïa ki jait jingïalehkai kiba ka jylla ka kham paw ha ki rynsan ïakop la ka long ha ki jingïalehkai National bad haduh ki International. “Peit nuksa ka Manipur ka kham pynleit jingmut ha ka boxing, weighlifting bad ka Haryana ha ka Wrestling,” ong u Myntri Rangbah
Halor kane u la bynrap ba kam dei pat ban ieh shadien ïa kiwei pat ki jait jingïalehkai hynrei ban sdang shwa ar ne lai tylli ki jait jingïalehkai kiba kham paw. “Watla ngin sdang ban leh kumta da kaba pynleit jingmut noh ha ki jait jingïalehkai kiba kham paw hynrei kam dei pat ba ngin ym phai khmat shuh ha kiwei pat ki jait jingïalehkai,” la ong u Myntri Rangbah uba khlem pynpaw pat ïa kino ki jait jingïalehkai ban kham pynleit jingmut noh.
Namarkata u la kyntu ïa ki nongpynïaid jong ki association ba kin sdang ban trei shitom nangne shakhmat ha kaba ïadei bad kane ka bynta.
Ha katei ka sngi ka sorkar jylla lyngba ka tnad ki kam ïalehkai ka la ai jingïarap ruh da ka song pisa sha ki synjuk ïalehkai bapher bapher kum shi bynta ban ïarap kyrshan ba kin pynkhreh na bynta katei ka lympung. “Kam lah satia ban long ba tang kaba ai ïa ki song pisa ïa ki synjuk ïalehkai ba kin lah noh mynta mynta hi ban wanrah khusnam na ki lympung heh hynrei kane kadei ka jingsdang ban nang kyntiew shuh shuh ïa ki kam ïalehkai,” ong u Conrad.
U la ong ruh ba ka sorkar ka la pyrshang bor bah ban kyntiew ïa ki kam ïalehkai ha kine ki ar snem wat hapdeng ka jingshah pynthut ha ka khlam COVID-19, da kaba pynlong biang ïa ka Meghalaya Games bad ka National Table Tennis Championship kaba la long ka kabu ïa ki samla ïalehkai kiba la pynpaw ïa la ki jong ki sap ïalehkai.
“Hadien ba ngi la ïoh ban pynlong biang ïa ka Meghalaya Games kiba bun ki jylla ki la sdang ban pyrthuh bud lang ban pynlong ïa kitei ki lympung ha ki jylla jong ki bad nga kyrmen skhem ba ka jingpynlong ïa ka North East Olympic Games kan dang kyntiew shuh shuh ïa ka jylla ha ki kam ïalehkai bad ngam artatien ba ka jylla kan ha ki shipew snem ban wan kan sa long kawei napdeng ki 10 tylli ki jylla kaba paw ha ki kam ïalehkai,” la ong u Myntri Rangbah.
U Myntri Rangbah u la ïathuh ruh ba ha ki saw snem tam ka jylla ka la ïoh ban kynduh ïa 5000 ngut tam ki samla ïalehkai ha kaba yn sa jied ïa kiba don ka sap kaba kham kyrpang ban hikai pyntbit.
“Shibun kiba la leit ban aireng shabar ki lut nalade hynrei mynta ka sorkar ka sdang ban ai ki jingïarap pisa watla ka long tang khyndiat hynrei kadei ka dak jong ka jingithuh ïa kito ba khur takma ha ki lympung meghalaya Games lane wat ha ki jingïakhun ha ka Ri,” la bynrap shuh shuh u Myntri Rangbah ka jylla.
Khadduh u Myntri Rangbah u la pyntip ruh ba shen kin sa don ki synjuk ba paw ban seng ïa ki jaka hikai phutbol kiba paka (centre of excellence) ha kane ka jylla.
Ha kane ka sngi la sam ruh ïa ki jingai sngewbha bad kitbok kitrwiang ïa ki samla kiban leit ban aireng ha ka National Games kaban sa long ha Goa naduh ka 29 tarik Nailur haduh ka 12 tarik Risaw 2022 ha Gujarat.
La ïadonlang ha katei ka sngi u Bah DP Wahlang, IAS Chief Secretary, Dr. Vijay Kumar D, IAS Commissioner bad Seceretary, Bah John F Kharshiing Working President ka MSOA, Deputy Commissioner ka EKH, ki ophisar ka tnad ïalehkai, ki President bad Secretary jong ki State Association bad ki nongïalehkai.