Ka Hinduism kam dei ka niam ka dei ka Kolshor baroh ki nong India ki dei ki Hindu : Bhagwat

Shillong, Nailur 25 : Ka Hinduism kam dei ka niam hynrei ka dei ka Kolshor bad baroh ki nong India ki dei ki Hindu, ong u khlieh duh ka RSS u Mohan Bhagwat.
U la ong ruh ba ka RSS kam don jingthmu satia ban pynkylla niam ïano ïano ruh namar ka ngeit ha ka jingïalong kawei wat la ïapher ka niam ruh. “ Ngi don hangne ym ban pynkylla niam ïa ki briew, baroh na ngi ngi dei ki Hindu namar ngi dei ki nong shong shnong jongka Hindustan. Ka Hindustan ka don shathie jongki lum Himalaya, Shatei na ka duriaw Indian Ocean ha syndah ka wah Indus. Ki nongshong shnong jongka ki dei ki Hindu na kata ka daw la khot bad tip ruh ïa ka kum ka Bharat” ong u Bhagwat haba kren ha ka jingïalang mynta ka sngi ha Soso Tham Auditorium.
U Bhagwat u la wan poi sha kane ka jylla ha ka Sngi Saitjaiñ bad un leit phai ha ka Lah Sngi U Blei.Kane ka long ka sien ba lai ba u la wan jngoh ïa ka jylla Meghalaya.
U la ong wat ki Mughal kiba la pynsaphriang ïaka niam Islam bad ki British kiba la pynsaphriang ïa ka niam Khristan hynrei ki Hindu ki ïai don bad ïaineh beit haduh mynta.
Haba pynshai shuh shuh ïaki mat bad nongrim treikam ka RSS u la ong ba ka kyntien Hindu ka long ïa kito baroh ki khun ka Bharat Mata ( ka Mei India) kiba la hiar pateng na ki longshwa man shwa bad im ïa ka jingim bad kolshor ki nong India.
U la ong ban long u Hindu ym dei ban kylla niam hynrei baroh kiba sah ha kane ka ri ki la dei lypa ki Hindu.
U la ong “ Ki briew ki sheptieng ba ïoh ka RSS kan wan ban pynkylla niam, ngi dei ki nong India, ban long u Hindu ym donkam ban kylla niam ngi la dei lypa ki Hindu, ngi ïa im ha ka jingshongsuk shongsaiñ ym donkam ban pynkylla ïano ïano ruh, ngi lah ban ïapher ha ka niam, ka ktien ka thylliej hynrei ngi ïalong kawei ngi dei ki khun jongka Mei India” ong u Bhagwat.
U la ong ka India kam dei ka ri kaba tynneng ïa ki ri sepngi, ka dei ka ri kaba dap da ka kolshor naduh hyndai hynthai bad ka dei ka ri kaba la hikai bad long ka nuksa ruh ïa ki ri ka pyrthei ban don ka mynsiem sngewrit.
U la ong shuh shuh ka jingkhang jongka RSS ka plie na ka bynta ban tip bad sngewthuh ïa ki rukom treikam jongka bad lada ki briew kim sngew ïahap ïa ki nongrim treikam jongka ki lah ban mih noh ruh ym don jingkhang. Ha kane ka sngi la ïadon lang ym tang ki dkhot ka RSS hynrei kiba bun ki dkhot bad nongïalam ka BJP ruh nalor ki seng bapher bapher jongki Hindu.
“ Haba ngi kren halor ka Hindutva kam mut ba ngi kren tang ïa kawei ka niam, ka jaidbynriew namar ka Hindutva ka dei ka rukom im bad ka kolshor” ong biang une u heh ka RSS.
U la ong dei tang ka India kaba long ka ri kaba ngeit bad burom ha kiba bun ki niam, ki rukom im, ki jait ktien, ki kolshor bad ter ter. Kane ka jingïapher ha ka niam, ka kolshor, ka rukom im, ka dei naduh ka juk Vedic bad naduh hyndai hi la ïa burom mar kylliang la ka dei ha ka niam, ka rukom im bad ka kolshor ruh.