Shillong, Nailur 24 : U Symbud Myntri Rangbah ka jylla, Bah Prestone Tynsong u la ong ba u i lyngoh pynban ïa ka ‘drama’ ba leh da ki seng bad ki party bapher bapher haba ïadei bad ka ishu Meghalaya Regulation of Gaming Act, 2021.
Kumban shu kdew hangne, bun ki seng kumjuh ki party bapher bapher ki la dawa ba dei ban pyndam noh ïa ka Meghalaya Regulation of Gaming Act, 2021.
Hynrei halor kane, u Symbud Myntri Rangbah u la ong ba na ka liang u Myntri Rangbah naduh ka sngi khatduh jongka Dorbar Synrai u la dep kren shai halor katei ka bynta.
“Ngam tip balei ba ka dang neh sah kane ka ishu haba ka sorkar ka la dep kren shai ba ngi la dep ban buh da u phulstop ban ym buh ïa ka casino. Tangba ïa ka Meghalaya Regulation of Gaming Act, 2021 ym lah satia ban pyndam noh,” la bynrap biang u Bah Prestone haba kren bad ki lad pathai khubor.
U la ong ruh ba ka sorkar jylla ka la dep rai ba kan ym ïaid satia shakhmat ban buh ïa ka casino namar ki nongshong shnong ki la dep ban pynpaw ïa ka jingbym sngewtynnad halor kane.
Hynrei, haba pynshai pat halor ka jingkynthoh kaba mih na ka UDP, ka party ba treilang ha ka sorkar kaba la kynnoh ba ym shym la rah satia ha ka cabinet haba ïadei bad katei ka phang, u Bah Prestone u la pynshai ba naduh ba sdang dei ka kynhun Myntri kaba mynjur ïa ka Bill ha ka dur jong ka Ordinance ha u snem 2021.
“Ngi la dep ban ïatai halor katei ka ishu bad nga tharai la kumba ar ne lai sien ha shwa ban mynjur da ka kynhun myntri bad hadien kane pat ngi la wanrah pat kum ka Ordinance,” la bynrap u Symbud Myntri Rangbah.
Shuh shuh u la pyntip ruh ba dei ha u Lber 2022 kata ha ka Dorbar Mangtyngka ba ïa katei ka Bill la mynjur bad ka la kylla long ka Act. “Kumta, ban ong ba ym pat khlem ïatai ha ka kynhun Myntri ka long kaba bakla,” u la bynrap biang.
Dang shen, u Vice President ka UDP Bah Allantry Franklin Dkhar u la kam ba ka jingai ïa ki lai tylli ki Provisional Licence ban buh ïa ki casino ha ka jylla ym shym la rah satia ha ka kynhun myntri.
