Shillong, Nailur, 25: Ki shipai ka Assam Rifles ha ka sngi Thohdieng ki la ioh kurup ïa u dawai “Methamphetamine tablets” haduh 55.80 kilo bad ki don haduh 5,05,000 tylli bad ka dor une u dawai kuli ka la kot sha ka T.167.86 klur.
Ïa u u dawai kuli Methamphetamine ki shipai Assam Rifles ki la ioh kurup na ka shnong Melbuk, Champai District, Mizoram ha ka 23rd Nailur 2022.
Ka jingioh kurup ïa une u dawai kuli ka long da ka jingkhynra lang bad ki Pulit hadien ba la ioh jingtip lyngba ki tnat syntiat.
Ki Shipai bad ki Pulit kiba la ioh ïa ka jingtip kaba biang ki la pynlong ïa ka jingap ktem bad ha ka por janmiet ki la ioh khang kdong ïa kawei kali bad ynda la talasi la ioh ban kurup ïa u dawai Methamphetamine ba don 5,05,000 tylli ba la song bha. Ïa une u dawai kuli, la kit da kawei ka kynthei hapoh ka kali jong ka.
Ha kine ki snem, ki shipai Assam Rifles ki la ïakhun tyngeh ban kthong ïa ki nongkhaii drok bad ïa ki nongkhaii suloi bad ïa ki tiar pynbthei.
Ki shipai Assam Rifles ki ong ba ka jingjur ka kynrum kynram ha ka ri Myanmar ka la pynkharoi ïa kine ki kam be-aiñ.
