Ka dei ka kam khyllung khynnah, u Gokhale u tip aiu shaphang ka Meghalaya : Bah Prestone Tynsong

By Mawphor Editor On Sep 26, 2022

Shillong, Nailur 25 : U Symbud Myntri Rangbah ka Jylla ba dei ruh u National Vice President ka NPP Bah Prestone Tynsong u la khyrwit kylla ïa u Nongai ktien ka Trinamool Congress u Saket Gokhale da kaba ong ba katei ka jingkwah ïatai nia jong u kadei tang ka kam khyllung khynnah suda.
Haba kren halor kane, u Bah Prestone u la ong, “U briew aiu une, haei ka jaka sah jong u, hato kadei ha Meghalaya.. kaei kaba u tip shaphang ka jylla Meghalaya.”
U la ïathuh ruh ba jin lada u Gokhale u thoh sha ka NPP ban ïakob ïa tai-nia lehse ka kam ka la ïaid da kumwei hynrei u thoh pynban sha u kum u Symbud Myntri Rangbah ka jylla kaba long ka jingleh khyllung khynnah kaba um lah satia ban pdiang.
“Ngi na ka liang ka sorkar ngim ju patiaw ïa kum kitei ki jaitbriew namar ha ka jingshisha u la dei ban pynpaw da kawei pat ka rukom,” ong shuh shuh u Bah Prestone
Shuh shuh u ong ruh ba u Gokhale kumba u dei ïalade u nongai ktien ka TMC lada jia ba u thoh sha u kum u National Vice President ka NPP lehse ka la long da kumwei pat.
“Nga dei u Symbud Myntri Rangbah ka jylla bad ngam ithuh satia ïa utei u briew,” la bynrap biang u Bah Prestone. Nalorkata u ong ruh kum u briew ba mihkhmat ïa ka jylla bad ïa ka sorkar jylla um ithuh satia ïa utei u General Secretary ka TMC.
Hynrei na ka bynta ki ishu saiñpyrthei lada jia ba u thoh sha u National President lane sha u National Vice President kumjuh sha u State President jong ka NPP ka la dei da kumwei pat. Hynrei ïa mynta ngam lah pdiang satia namar ngam sngew ïahap ban pynsngew namar ngam ithuh ïa utei u briew bad ruh nalor ba um dei u nong Meghalaya ban wan tuklar ïa kaei kaba ngi leh na ka bynta ka jylla,” bynrap biang u Bah Prestone.
Dang ha ka taiew ba la dep u Gokhale u la kob ïa u Bah Prestone sha ka jingïatai ïa halor ka ishu jong ka Shillong Smart City bad ruh halor ka jingkhyllem jong u dome bad ruh halor ki jingkynnoh Duna ha ka rukom ai kontrak.
Ha katei ka shithi ba u phah sha u Symbud Myntri Rangbah ka jylla u Gokhale u la ong, “Nga ai jingmut ba sha ka jingïatai nia ha ryngkat ka jingdonlang ki lad pathai khubor ha Shillong halor ki ishu ka jingbym lah treikam bha.” Nalorkata u la ong ruh ba kano kano ka tarik ka biang ha ka taiew ba nyngkong jong u Risaw.