Mih jingbym hun ka jingpynbeit pud namar bym ïaid katkum ka Constitutional Boundary: HANM

Shillong, Nailur 25: U President ka HANM u Bah Lamphrang Kharbani u la ong ba ka jingbym hun ki paidbah nongshong shnong ka jylla khamtam eh kiba sah ha ki thaiñ khappud ka daw hi ka dei namar ka sorkar kam ïaid kat kum u pud u sam ba la kdew kat kum ka riti synshar ka ri ha ka jingpynbeit pud ha ka Wat ba nyngkong.
Ha ka jingïakren sha ki lad pathai khubor na ka liang u President ka seng u Bah Lamphrang Kharbani u la ai ka jingïaroh ïa ka sorkar MDA kaba la nud ban shim ka sienjam ban ïaid shakhmat ïa ka jingpynbeit ïa u pud u sam bad ka jylla Asaam hynrei u ong ba ka jingbym hun naduh ki seng bhalang bad ki nongshong shnong ka jylla hi baroh ka dei namar ka jingbym ïaid kat kum u pud u sam ba la kdew kat kum ka North East Reorganisation Act 1971 ban kam trai ïa ki jaka jong ka jylla.
U la ong ruh ba kumba ka seng naduh ka sngi kaba nyngkong ka ïeng skhem beit ba kam ai lad satia ïa ka jingwan kyntur pud ka Assam syha ki bynta ka jylla u ong ba haduh kat kine ki sngi ruh ka ïeng ha kata ka nongrim.
“Ha ki khyndiat por ba la dep ngi kum ka seng ngi ngi la leit ban jynrat ruh ïa ki mawpud kiba ka sorkar Assam ka wan pynïeng bad ngi la leit ruh ban bret ïa kine ki mawpud ha khmat ka Secretariat bad KHADC” u la ong.