Nongstoiñ, Nailur, 25: Ka seng Congress Nongstoiñ lyngba ka Nongstoiñ Block Congress Committee, ka la sdang shait shait ïa ka jingpynkhreh ban jop noh ïa ka elekshon MLA ka ban sa long ha u 2023.
Ha ka sngi saitjaiñ jong ka taiew, ka party ka la pynlong ïa ka jingïakynduhlang jong baroh ki dkhot nongkitkam ka party ha Congress Bhavan Nongstoiñ, ha kaba la donlang ruh da u Bah Gabriel Wahlang MDC ka Nongstoiñ, u ba long ruh u President ka party bad u kyrtong sha ka elekshon MLA ha u snem ban wan.
Ha ka jingïakynduhlang jong ki dkhot ba shitrhem jong ka party, la pynsngew ïa ka kyrteng ki nongkitkam ba hakhmat kiba don ïa kumba 50 ngut ei ei. Ka la don ruh ka jingïaphylliew para nongïalam bad ki jingai jingmut mar kylliang, kumno ban nang pynkhlaiñ ïa ka party ha man la ki kyndong kynshrot jong ka Constituency, khnang ban kheit ïa u soh jingjop.
Na ka liang u Bah Gabriel Wahlang haba ai jingkren sha ki para nongkitkam ka party, u la pynpaw ïa ki kyntien ban don ka jingïalong kawei bad ka jingïatylli para nongïalam. U la ong ruh ba kum ki dkhot bad nongkyrshan ka party, kaba donkam ka long ba baroh hi kin trei shitom da ka mynsiem jong ka jingieit bad jingsngewrit, ban ïalap ban ïawer sha kiwei pat khnang ban wanrah ïa ka nam ka burom jong ka Congress ha Nongstoiñ.
Na ka liang u Bah Bormanding Nonglang President jong ka District Congress Committee, u la pynpaw ïa ki kyntien ka jingkyntu sha ki nongïalam ka NBCC, ba kin trei shitom naduh ka mynsiem bad kyrmen skhem ba ka party kan kheit ïa u soh jingjop ha u snem ban wan na kane ka Constituency.
U la pynpaw ruh hapoh ka jingïalang ïa ki kam leh donbor bad ki kam jingleh shilliang jong ka sorkar MDA kaba la ktah haduh katta katta ïa ki paidbah nongshong shnong. U la ong ba ka sorkar MDA ba la ïalam da ka NPP ka la shukor ka la thok ïa ki paidbah. Kumta ka long kaba donkam ba ki paidbah nongkyrshan ka party kin ieng skhem kawei ka jingmut ban wanrah pat ïa ka jingjop ka Congress party, khnang ban ïoh pat ïa ka jingsynshar ka bym thohbria ne kaba leh shilliang khmat.
Lah ban pynkynmaw ba u Bah Gabriel Wahlang bad ka Congress Nongstoiñ ha ka elekshon MLA 2018, ka la shah rem noh tang 60 vote ha u MLA ba mynta u ba dei na ka seng NPP, kata ruh lyngba ki ballot paper. Ha ka jingïalang kaba la long ha ka sngi saitjaiñ ha Congress Bhavan, ka la don ka jingïakren na ki katto katne ki nongïalam halor kane ka bynta bad don ruh kiba la jaw ummat.
Hynrei, lah ban pynkynmaw ba ha ka MDC elekshon kaba la long ha u 2019, u Bah Gabriel Wahlang u la jop don burom haduh 6 hajar tam pyrshah ïa u kyrtong MDC na ka seng NPP. Kumta ka sur na ki nongkyrshan ka Congress kylleng ki jaka, ka long ban pynkhreh bha janai namar ha u 2023 ka la dei sa ka pali jong ka party ban ïoh noh ïa la u jong u MLA sha ïing dorbar thawaiñ jong ka Jylla.
