Shillong, Nailur 25: ka St Anthony’s College, Shillong ha ka 20 tarik Nailur ka la ïoh ban pynskhem pura bad ban pyntian smai ïa ki samla pule kiba pynïasoh sha ka Rovers and Rangers, St Anthony’s college Unit ba kin long ki dkhot ba pura jong kane ka kynhun ban shakri ïa ka imlang sahlang katkum ka thong bad ka jingangnud kaba kum ka kynhun treimon sngewbha ka buh hakhmat. Ïa kane ka unit ha St Anthony’s yn ïalam da u Vancouver Shullai bad Ms. Dayomika Kharsyntiew, kiba dei Faculty Coordinators jong ka unit.
Kane ka jingpynskhem ka St Anthony’s College ka long ruh ruh ban ban wanrah lang ïa ki samla pule kiba don ka juh ka thong ban trei na bynta ka imlang sahlang khlem da khmih lynti ïa ka nongkylliang shimet.
Kine ki samla kiba la shah pyntian smai ha kane ka sngi ki dei ruh kiba la wan shim bynta sha ka exposure camp kaba la pynlong ha Nerhema, Nagaland.
Ka Rovers and Rangers jong ka St Anthonys ka dei ruh ka shnat treikam jong ka Bharat Scout &Guide kaba dei ka kynhun treimon sngewbha kaba don ha kylleng jong ka ri India.
Kane ka jingpyntian smai ïa kine ki samla la wan long kongsan da u Rev. Fr. D. John, SDB ha ryngkat ka jingdon lang u Bah W. Lyngdoh, State Secretary, jong ka Meghalaya Bharat Scout and Guide(MBSG)kum u Symbud Kongsan ha ka jingïadon lang kiwei pat ki kynrem ki lyndan ba kynthup ïa ka Kong Amelia Swer, ka State Secretary barim jong ka MBSG, u Bah Akin Kharmawlong bad Rev. Br. Dr. Albert Longley Dkhar, Principal jong ka kolej.
Ïa ki Rovers and Rangers kiba la shah pyntian smai ha kane ka sngi la aiti ruh ïa u badges bad neckers kum ka dak ka shin jong ka jubanlak ba ki la shim ban trei na bynta ka kynhun.
