Shillong, Nailur: U MLA ka Mawlai u bah PT Sawkmie ha ka sngi Saitjaiñ ba la lah ula leit ban ai jingïarap sha ka seng kynthei jong ka shnong Umrynjah, sha ki 10 tylli ki Self Help Group (SHG) bad sha ka shnong Umrynjah ba la sam ha phyllaw jong ka ïing dorbar ba dang dep maramot thymmai.
Ka seng kynthei shnong Umrynjah ka la ïoh ïa ki tiar shet tiar tiew, ki 10 tylli ki SHG ki la ïoh jingïarap mar 5000 tyngka, kaba u la pynurlong ïa ka jingkular jong u bad ka shnong Umrynjah ka la ioh ïa ki tyrpal bad ki top syntek.
Haba ai jingkren u Bah PT Sawkmie, u pynpaw ba lada U Blei u isynei bad u jop biang un sa pynpra noh ïa kane ka iing shnong bad tei da bathymmai, kaba armala syndon.U pynpaw ruh ba ka 5000 tyngka kaba u ai ka dei tang ka jingkitbok ïa ki ba kin nanglah ban trei khambha. U Bah PT Sawkmie u kyrpad ruh ïa ka jingïalang bad kumjuh ïa ka shnong ba kan pynjop biang ïa u khnang ba un nanglah ban trei khambha shuh shuh na ka bynta ka thaiñ.
Ha kane ka sngi la ïoh ruh ïa ka jingkren na u rangbah shnong ka Umrynjah u bah J. Kharrngi uba la ai khublei bad pynpaw ka jingsngewnguh ïa u MLA bad u la pynpaw ba ki matti jong u ka ïai paw na ka por sha por, wat ka iing dorbar ruh dei por jong u bad mynta u la pynmaramot thymmai ïa ka ïingdorbar na ka jingïarap jong u hi.
Na ka liang u president ka UDP Mawlai Circle, u bah Homer Kharkongor, u la pynpaw ba um lah khlem da pynpaw ïa ki kam kiba u bah PT Sawkmie u la leh ïa kiba bun hapoh Mawlai, kumjuh ïa ka Umrynjah.
“Ngi la mad ïa ki jingeh ha ka por jong ka khlam bad ngi la ïohi ba i bah PT Sawkmie im ju riej ban leit sam jingïarap sha kiba kyrduh bam, sha kiba donkam bad ïa kane, ym tang ma nga ba ong, hynrei kiba bun balang ki pyrto ïa ki kam jong i,” ong u bah Homer
U la bynrap, “Ngi dei ban don ïa ka mynsiem sngewnguh ban ïarap lem ïa uba ïarap ïa ngi.”U ong ruh shuwa ban thep ïa ka vote, “Ngi hap ban bishar bniah bad ban bud ïa u briew uba dei biang, ym ia kiba shu pynbam pisa bad ban ai pat ïa ka vote ha ki. ïa u MLA ngi ïoh beit ban ïakynduh ha kano kano ka por, kumno ngin jied ïa kiwei pat kiba tang ïa ka phone ruh kim ju shim bad wat ban ïakynduh ruh shem jingeh.”
Kiwei kiba la ai jingkren ki kynthup ïa ka president jong ka Village Organisation kaba la ai khublei ia u MLA, la ïoh ruh ka jingkren na u bah Franky Massar, secretary shnong bad kiwei kiwei.
