Yn ïaknieh rung phainal ka 7 Wasa pyrshah ïa ka Nangbah Mulang ha ka ‘Super Division’

Jowai, Nailur 25: Ka lympung ïalehkai ‘U Kiang Nangbah Memorial Trophy’ Super Division Football Tournament-2022 bala pynïaid da ka West Jaiñtia District Sports Association (WJDSA) ha Kiang Nangbah Stadium Dongmihsngi kaba la long ha kane ka sngi saitjaiñ, ka kynhun ïalehkai jong ka Nangbah Mulang kala jop da kaba pynliem da 2-1 kol ïa ka Mynthong.
Haba phai sha ka jingïakhun jong kine ki ar kynhuh kala long kaba ïakhaid bha naduh kaba sdang tad haduh kaba kut jong ka jingïalehkai bad kane kala pynhun shisha ïa ki riewieit phutbol kiba la wan ban sakhi ïa ka jingïalehkai.
Ha ka jingïakhuh ka Mynthong kala ïoh shwa ban pynkhih ïa ka jar kaba nyngkong lyngba u rangïalehkai jong ka u Romaric B Nguefang ha ka minit kaba 24. Ka Nangbah Mulang ka la ïathuh tyngeh ban pynphai ïa katei ka shikol bad dei haka minit kaba 52 u Promi Suting ula ïoh ban thep ïa ka kol bad kila poi sha ka jingïakhaid haduh ba kut jong ka kylla miet.
Ka jingïakhun kala poi noh sha Extra Time katba ka jingïaleh kaba dang ïaid bha shakhmat u rangïalehaki jong ka Nangbah Mulang u Pynishai Lathong ula ïoh ban thep ïa ka kol kaba ar ha ka minit ba 101 bad ka la jop syndon da 2-1 kol ïa ka Mynthong. Kumba ka long mynta ka Ladthadlaboh kala bun jaka ïalade ha ka jingïakhun Final jong kane ka lympung, kiba ïaknieh ban rung Phainal ki long hapdeng ka 7 Wasa pyrshah ïaka Nangbah Mulang ha ka 1.10.2022 haka por 2 baje nohphai sngi.