Sdang ka Sunfeast Cup ha Madan Jyntru, wan shim bynta 60 tylli ki kynhun ïalehkai na ka jylla

Nongpoh, Nailur 25: Kumba ju leh man la u snem ban lum ban lang ïaki khynnah don sap ha ka kam ïalehkai phutbol, ka Lynti Jam Welfare Development Association (LJWDA) ha ka sngi Saitjaiñ kala sdang biang ban plie pyrda ïaka lympung ïalehkai phutbol bala tip kum ka Sunfeast Cup 2022 ha Madan ïalehkai ka Shnong Jyntru.
Ïa katei ka lympung la wan ban plie pyrda da u Bah Primson Makdoh uwei naki Samla Rangbah naka dong Ri Bhoi, haka jingdonlang u Bah EK Dkhar Head Coach ka PFR kum u symbud kongsan, Bah Moses Syngkli Lyngdoh ka Raid Nongkharai ba dei ruh u Rangbah Shnong ka Shnong Jyntru, Bah Sumarlang Swer President ka Lynti Jam Welfare and Development Association, ki nongmihkhmat naka SPT Bangalore bad Sunfeast kiba la bei tyngka ruh ïa katei ka lympung.
Ha katei ka lympung kumba 60 tylli ki kynhun na kylleng ka jylla kila wan ban ïashim bynta shitrhem bala pynïalehkai haka kyrdan U-13 bad U-16 shapoh na ka bynta ki Shynrang bad 16 snem jong ki kynthei ha ar tylli ki madan ïalehkai ba kynthup ha Mawlein Mawkhan bad madan Jyntru.
Kum ban shu pynpaw ba ïa katei ka lympung la pynsangeh mynta la kumba 2 snem namar ka jingwan lyngshop jong ka khlam COVID 19, bad lyngba katei ka lympung kan long ruh ka rynsan ïaki khun Samla ha kaba ki kynhun ba jop kin sa ioh ruh ban leit shim bynta sha ki jingïalehkai shabar ka jylla.
Na ka liang u Bah Primson Makdoh kum uwei na u samla rangbah ka dong Ri Bhoi, haba kren ha kane ka jingplie ïa kane ka lympung ïalehkai u la ai jingïaroh ïa ka Lyntji Jam Welfare Development Association ka la shim ïa ka jingkitkhlieh ban pynlong ïa kane ka lympung ïalehkai bad u kyrmen skhem ruh ba da ka jingdon kum kine ki rynsan kiba bun ki khun samla ba don sap ha ka jingïalehkai phutbol kin ioh ban sei madan ïa ki sap ki phong kumba la ai kyrpang da U Blei.
Shuh shuh, u la bynrap ruh ba kum u samla ka dong Ri Bhoi un dang ai ka jingkyrshan ïa kane ka Association ba kan dang lah ban ïaid shaphrang ban pynlong kum kine ki lympung, namar ka jingïalehkai phutbol ha kine ki sngi ka la dei shisha kawei na ka lad ban kyntiew ïa ki khun samla ha ka liang ka ioh kam ioh jam bad ruh ba lada ki samla ki pynlut por ha ki kam sport kin lait ruh shibun na ki jingsniew kum ka kyiad, drok bad kiwei kiwei ki jingdih ba sniew kiba pynhiar dor ïa ka long rynieng ki khun samla, u la bynrap.