Beh ka lyer sha u Bah Methodius ha Mawshynrut Constituency

Nongstoiñ, Nailur, 25: Katba nang mih ki sngi ka HSPDP Mawshynrut constituency ka la nang khlaiñ bad nang ïoh mynsiem da ka jingwan pynïasoh jong ki paitbah haman la ki jaka. Dang ha ka sngi saitjaiñ, u bah Methodius Dkhar kyrtong ka HSPDP na Mawshynrut ryngkat ki nongïalam jong ka party, ki la hiar sha ka shnong Maweit ban pynlong jingïalang bad pynskhem ïa ki nongkitkam kiba dei na kiwei pat ki party kum ka NPP, Congress, PDF kiba la wan ban pynïasoh sha ka party.
Ha katei ka sngi la pynlong ïa ka jingïalang ha madan jong ka Maweit Presbyterian Secondary school ha kaba palat lai hajar ki paitbah nongkyrshan ki la ïa poi. Ha shuwa ban sdang ïa ka jingïalang, la pdiang sngewbha ïa u kyrtong da ka kynhun ki nongtem sur tynrai jong ki Lyngngam kaba ki la tip kum ka ‘shad ksan rngiew’.
Ha katei ka jingïalang ka kong Magdalin Diengngan President ka HSPDP Women wing Maweit area, ka la ong ba ka thaiñ Maweit ka dei kaba dang sahdien ha baroh ki liang, la ka long ha ki lynti synkieng, ka koit ka khiah bad kiwei kiwei. Ka la ong ruh ba watla ka la don ka PHC, hynrei haduh mynta ki longkmie ba armet kiba thmu ban leit kha khunlung ha katei ka jaka sumar ka thaiñ ki dang ïakynduh shibun ki jingeh namar kam pat biang satia. Ha katei ka jaka sumar ka don tang kawei ka kamra kha khunlung bad lada don arngut lai ngut kiba leit kha ha kajuh ka por ki hap ban thiah ha madan.
Katei ka nongïalam ki longkmie ka la ong ruh ba ha kine ki sngi, la ïoh jingtip ba kin don kiba wan seng karkhana saiñ dewïong ha katei ka thaiñ. Lada katei ka jingthmu kan urlong ki paitbah ka thaiñ, kin sa mad shibun ki jingeh bad ka mariang kan sa shah ktah jur ha ka tdem jong ki karkhana bad ki paitbah kin ym ïoh shuh ïa ka lyer kaba khuid.
Ka kong Badariti Lyngdoh Nonglait President ka HSPDP Women wing central body, ka la ong ba bun ki nongïalam ha kine ki sngi ki ju kynthoh ba ka jinglong nongmihkhmat jong u (L) Maieit Hopingstone Lyngdoh, ka long kaei kaei ka bym lah ban pdiang, namar naduh ba u la long u nongmihkhmat um shym la shet kylla haduh ba un da khlad noh na kane ka pyrthei. Ka la ong ruh ba wat la u la long nongmihkhmat la palat sawphew san snem um shym pat la ïapeiñ ïa ka jaitbynriew bad ka spah ka phew kum ki ba mynta.
U M.Marak uwei na ki nongïalam jong ki Garo, u la ong ba baroh shi katta ki paitbah Garo kim pat ithuh satia ïa ka HSPDP, hynrei ha kine ki snem ki la sngewthuh shai ba katei ka party ka dei shisha kaba don ïa ki nongrim ban ïada ïa ka khyndew ka shyiap bad ïa ka hok ki nongshong shnong ha ka jylla baroh kawei.
U bah Methodius Dkhar haba ai jingkren, u la ong ba kam ïaleh election kam dei na ka bynta ban kamai spah lane ban ïoh jingmyntoi ïalade. Hynrei dei ban peit ïa ka jingeh jong ki paitbah jong ka jylla. U la pynkynmaw ruh ba ha kine ki snem ba ka sorkar MDA ba la ïalam da ka NPP ka synshar, ka jingeh kaba nyngkong ka dei ka jingshah pynïap jong u samla Khasi ha Ichamati ha ki bar jylla, ka jingïakhih ïa ka them Metor, ka jingmynjur jong ka Agatha Sangma ban pyntreikam ïa ka Citizenship Amenmend Act bad kiwei kiwei.
Nalor kata u la ong ruh ba ka jingkhaïi tuh ïa u dewiong kaba la pynduh nong da ki hajar klur ïa ka jylla baroh kawei. U la ong ruh ba lada ki paitbah ki pynjop ïa u ha kane ka election ban wan, lada ki paitbah ki ïakynduh kino kino ki jingeh u kloi ban ïatreilang bad lada ka sorkar kam sngap ïa ka jingdawa ki paitbah, u long u ba kloi ban ïalam ïa ki sha Secretariat ba kin ïakhih.