Shillong, Nailur 25 : Ka kynhun ki khynnah ïalehkai Judo jong ka East Khasi Hills District ki rahïa ka nam lahduh na ka rynsan ïalehkai judo ba la tip ïa ka kum ka Meghalaya Judo State Championship, ba la pynlong ha ki ar sngi ha ka 23 bad ka 24 tarik mynta u Nailur 2022, ha SAI STC Indoor Hall, NEHU.
Ka jinglah ka kynhun ïalehkai ka East Khasi Hills ban rah ïa ka nam lahduh na kane ka rynsan ïalehkai ka la wan hadien ba ki la ïoh ban khur 8 tylli ki takma ksiar, 1 ka takma rupa bad 3 tylli ki takma rnong bad baroh ki long 12 tylli. Ka kynhun kaba wan ba-ar ka dei ka Eastern West Khasi Hills District kaba khur 4 tylli ki takma ksiar 1 ka takma rupa bad 4 tylli ki takma rnong, ka Ri Bhoi ka wan kyrdan ba lai da kaba khur mar 3 tyli ki takma ksiar bad rupa bad bad 2 tyli ki takma rnong.
Ka West Jaintia Hills ka wan kyrdan ba saw kaba ïoh ba kan khur 1 ka takma ksiar, 8 tyli ki takma rupa bad 1 ka takma rnong, bud sa ka West Garo Hill ha ka kyrdan ba san kaba la ïoh 2 tylli ki takma rupa bad 4 tylli ki takma rnong, ka West Khasi Hills bad East Jaintia Hills ki bat ïa ka kyrdan kaba hynriew bad ba hynñiew hadien ba ki la ïoh ban khur mar kawei ka takma rupa bad rnong.
Ha katei ka sngi kut la wan ban don lang u Gunin Changmai kum u kongsan uba ba dei u nongkhmih ba shipor (incharge) jong ka SAI, STC NEHU ïa kaba la wan ban synran lang ïa u da u football coach.
Ha kane ka kynti ba mynta la don haduh 107 ngut ki khynnah shynrang bad kynthei ba la wan ban ïashim bynta sha kane ka jingïakob na ki 7 tylli ki district jong ka jylla.
Ka MJA ka la pynlong ia kane ka jingiakob shi bynta ban ïoh jied ïa ki 32 ngut ki nongïalehkai ba tbit ba kynsai kiban khreh ban mihkhmat ïa ka jylla sha ka 2nd North East Olympic Games kaba la kynriah noh sha ka 10-16 tarik u Naiwieng 2022.
