Shillong, Nailur 25 : Ka Kharang SC, Pingwait SC bad ka Mawjam SC ki la jop ha ka jingïalehkai Mawkynrew Cup kaba la long ha ka sngi Saitjaiñ ka taïew ba lah dep.
Ha katei ka jingïalehkai ha madan Jongksha, ka Kharang SC ka la khur jingjop da kaba pynliem lyngba ka jingïashut tied-breaker pyrshah ïa ka Pyngkya SC da 5-4 kol kaba dei ka jingïalehkai kaba nyngkong.
Ha ka jingïalehkai kaba ar, ka Pingwait SC ka la pynliem da 4-0 kol pyrshah ïa ka Mawlyngot SC, ïa kitei ki kol la thep da u Royalsonly Nongrum (19, 28&47 min) bad u Laitsing Jersey (30min). Ha ka jingïalehkai kaba lai bad kaba khadduh jong katei ka sngi, ka Mawjam SC ka la pynliem da 2-1 kol ïa ka Dienglieng SC. U Klinton Umsong u la thep marwei ïa kitei ki 2 kol katba u Firstbornson Nongrum u thep shi kol ïa ka Dienglieng.
