Nongpoh, Nailur 23: U Bah Sosthenes Sohtun MLA ka Jirang haka 19 tarik mynta u bnai u la phah syndon da ka jingthoh sha u Myntri Rangbah ka jylla ba ka sorkar ka dei ban pynsangeh noh shi syndon ïaka jingwanrah ïaka Casino ha Ri-Bhoi District kumba ki paidbah kila mih ban pyrshah bad kadei ruh kawei naki mat ba khluid haka jylla.
Kum u MLA ka Jirang u la kyrpad ruh sha u Myntri Rangbah ba ka sorkar ka dei ban pynmih syndon da ka jingthoh ha kaba ïadei bad ka jingpynsangeh ïaka jingïaid shaphrang jong ka Casino haka jylla kaba la thmu ban tei ha Ri-Bhoi District ba kum u MLA um kwah ban mih kano kano ka huri hura kaba ktah ruh ïaka jingsngew jong ki paidbah.
U Bah Sosthenes Sohtun u la ong ruh ba hynnin ka sngi ki seng bhalang kila mih paidbah ban pyrshah kaba la wanrah ruh ka jingkhluid ba shi por hadien ka jingkhang ki bor pulit ban leit sha Khanapara, bad kum u MLA um kwah ba katei ka Casino kan dang treikam ha Ri-Bhoi hynrei ban sangeh noh mardor.
