Nongstoiñ, Nailur, 23: Ka Nongstoiñ District Sport Association (NDSA) mynta ka sngi Palei ka la ïoh ban pynhap pyrda noh ïa ka jingïalehkai kynjat bol Super Division ïa kaba buh ruh da ka khusnam pisa kaba la kot haduh 40 hajar tyngka. Ha katei ka sngi ki kongsan ki kynthup ïa u bah Macmillan Byrsat MLA ka Nongstoiñ konsti-twensi bad u bah H.G Lyngdoh Superintendent of Police jong ka West Khasi Hills District.
Ha katei ka jingïaleh-kai kaba khaduh kaba la ïakynduh hapdeng ka shnong Pyndengrei SCSC pyrshah ïa ka shnong Khliehmawlieh YC, ha kaba ym shym la don mano mano napdeng jong kitei ki 2 kynhun kaba la ïoh lad ban pynkhih jar wat haba ka Pyndengrei ka la ïoh ïa shibun ki kabu bad kaba la kham ñion ïa ka Khliehmawlieh YC.
Hadien ka 90 minit la hap ban phah ïakhun biang da ka extra time, phewse wat ha kitei ki minit ruh ym shym la don hi ka kynhun kaba la ïoh ban thep kor, kumta la hap ban phah ïakhun noh da ka tie breaker ha kaba ka Pyndengrei SCSC, ka la ïoh ban jop noh shi syndon bad ban rah ruh ïa ka nam lahduh ha katei ka lympung bad ban khur ruh ïa ka song pisa kaba 40 hajar tyngka nalor ki takma, katba ka Khliehmawlieh YC pat ka la ïoh tang 5000 tyngka.
Ha katei ka jingïalehkai ïa ka nam kum u rang ba kynsai tam, la ïoh ban rah da u samla Royal Ïawphñïaw na ka Pyndengrei SCSC, u nongap kol u ba tbit tam la ïoh ban rah da u samla Hanlis Syiemlieh na ka Khliehmawlieh YC, u nongthep kol ba bun tam la ïoh ban rah da u samla Living Nongrang na ka Khliehmawlieh YC, u ba la ïoh ban thep haduh 6 kor naduh ba sdang ka lympung. Ïa ka nam kum u ba sdang khiesan bad dang khynnah tam la ïoh da u Rodingson Dkhar Nongpyndeng bad ïa ka nam kum u nongïalehkai batbit tam na baroh, la ïoh ban rah da u samla Lenny Lyngdoh na ka Khliehmawlieh YC.
