Ym tang sha ka NPP, hynrei bun ngut ruh ki ban rung sha ka UDP: Rymbui

Kynshi, Lber 31: U Bah Lahkmen Rymbui, MLA jong ka Seng UDP, uba long ruh u Myntri ka sorkar jylla, u la ong ba ym tang ka Seng NPP kaba lah ban tan briew, hynrei ki don bun ngut ruh kiba la ai ktien ban rung sha ka Semh UDP ruh.
Haba kren ha ka jingïalang jong ka Seng UDP Mawthadraishan Circle kaba la long mynta ka sngi ha Kynshi na ka bynta ban pynrung dkhot thymmai sha ka Seng, u Bah Rymbui u la ïathuh ba kine ki ban wan ki kynthup ruh ïa ki MLA, ki MDC bad ki riewpawkhmat.
“Ïa mynta ngim pat kwah ban ïathuh, hynrei ngin sa buh da ka por ban pynrung ïa ki sha ka Seng”, u la ong.
Shuh shuh u la ong ruh ba ki don ki jaka kiba ka NPP ka ïoh khring briew bad ki don ruh ki jaka kiba ka UDP ruh kan ïoh.
Haba pynpaw ba dei tang ka Seng UDP kumba long mynta kaba lah ban ïaknieh ïa ka bor synshar na ka NPP ha u snem 2023, u Bah Rymbui, u la ong ba lada ka UDP ka trei shitom bad ïeng da ka jingïalong kawei ka don ka lad ban ïalam ïa ka jingsynshar ha ka jylla ruh.
Haba pdiang sngewbha kum u nongmihkhmat na ka Seng Kmie jong ka UDP, ïa ki spah ngut kiba wan pynïasoh sha ka UDP Mawthadraishan Circle, u Myntri kam pohïing, u la ong ba kane ka jingwan pynïasoh ki spah ngut na kiwei pat ki Seng sha ka UDP Mawthadraishan, kadei namar ka jingtreikam bha jong u MLA, u Bah HB Nongsiej.
Napdeng kine kiba wan pynïasoh thymmai la kynthup ruh ïa u Bah BB Warjri, MDC barim ka Mawthadraishan.
“Kum u para MLA bad kum u para Myntri, nga ïohi ba u MLA jong phi, u la wanrah shibun ki kam pynroi ha Mawthadraishan bad kane kadei ka kam kaba kongsan jong u Nongmihkhmat”, u la ong.
U la kynthoh ruh ba ka jingong kiba bun ban theh da ka pisa ha ka elekshon, kadei kaba bakla, hynrei ka spah kaba u MLA Mawthadraishan ka long da ki skhim pynroi kiba poi da ki phew klur tyngka naduh ki surok, ki skul, ka umbam umdih bad kiwwei kiwei. “Kane keiñ kadei kata ka spah kaba u MLA jong phi u la theh”, la ong u MLA ka Amlarem.
Na ka liang u Bah HB Nongsiej, ha ka jingkren jong u, u la ai khublei bad pynpaw ka jingsngewnguh kaba khraw ïa ka jingwan pynïasoh ki riew rangbah, ki longkmie bad ki samla sha ka UDP Mawthadraishan bad kane kan nang ai mynsiem shuh shuh ïa u bad ïa ki nongïalam jong ka Seng ban nang trei khambha shuh shuh na ka bynta ka roi ka par ha Constituency.
U la ïathuh ruh ba u la sam bun tylli ki skim ha kine ki saw snem baladep bad la jan baroh ki shnong hapoh Mawthadraishan Constituency ki la ïoh jingïarap kum ki shuki, ki khiew shet, ki tiar pynsawa, ki tyrpal,ki unform phhutbol bad kiwei kiwei. Nangne shakhmat u la ïathuh ruh ba un dang sam shuh sha ki shnong kiba dang donkam ka jingïarap na u.
Nalor kane, u la pyntip ruh ba la sam skhim sha ki longïing longsem kiba duk kiba kyrduh, ki nongrep, ki samla bad kiwei kiwei.
Ha kane ka jingïalang la ïoh ruh ka jingkren na u Bah Jambor War, MDC Mawthadraishan uba long ruh u EM jong ka KHADC. U Bah Jambor u la ong ba ka jaidbynriew Khasi Jaiñtia ka angnud ban ïoh noh da u Myntri Rangbah na ka jaidbynriew la jong bad kane kan urlong tang lada ka UDP ka lah ban ïalam ïa ka jingsynshar ha ka jylla.
Hadien kane ka jingïalang pdiang burom, la pynlong ruh ka jingsam skhim, ha kaba la sam ïa ki shuki, ki tyrpal, ki khiew shet sha ki shnong bapher bapher bad kumjuh ruh ki Seng Kynthei.