Shillong, Lber, 31: Ka Hyñiewtrep Youths Council (HYC) Mawlai Circle ha ka sngi Palei ka la phah da ka jingthoh sha u Myntri ka tnat Transports bad sha u Managing Director jong ka Meghalaya Transport Corporation, Shillong ban kyrpad na ka bynta ban aiwai ïa ki dukan ne Guest- House bad kiwei kiwei ki kam aiwai jong ka Meghalaya Transport Corporation ha Inter State Bus Terminus, Mawlai Mawiongrim sha ki samla trai muluk.
“Ki don bunbah ki khun samla trai ri trai muluk kiba la nang la stad bad biang ka kyrdan pule ki mad ïa ka jingeh jong ka kyrduh kam kyrduh jam, haduh mynta, dang duna eh ki lad ai kam ai jam na ka liang ka Sorkar Jylla na bynta ki samla wadkam wadjam. Ka ïoh ka kot, ka khaii pateng ka dang duna bad sahdien eh ha ka jylla jong ngi lada ïa nujor bad kiwei pat ki jylla. Bun ki briew na kiwei pat ki jylla ki ïoh laitlan eh ban treikam bad khaii ha kane ka jylla ka jong ngi khlem kano kano ka jingtehlakam da ki bor Sorkar bad kane ka buh jingeh bad pynduh jingkyrmen ïa kiba bun ki nongtreikam trai ri-trai muluk ban trei ïa ki kam bapher bapher,” ong ka dorkhas ba la soi da u President ka Seng u Bah Donbok Kharlyngdoh bad u Vice President u Bah Rhembor Saibon.
“Shen yn sa plie noh ïa ka ISBT ha Mawiong Rim ïa kaba bun ki dukan, ki ing shong basa (lada don) ba kiwei kiwei ki kam yn sa aiwai. Kane ka long kum ka lad aikam aijam ïa kiba bun ki nongwad kam bad ki nongtrei kam ym tang ha ka thaiñ Mawlai hynrei na kiwei pat ki jaka ruh kumjuh,” ong ka seng.
“Halor kitei ki jingshisha ba la pynpaw haneng ka Hynniewtrep Youths’ Council Mawlai Circle ka ai jingmut ba baroh ki nongshim wai ïa ki dukan bapher bapher, ki (Guest House) ing shong basa bad kiwei kiwei ki jait kam dei ban ai tang ïa ki trai ri-trai muluk. Ka Meghalaya Transport Corporation ka dei ban da phikir bha ban tehlakam da ki kyndon kiba khlaiñ pyrshah ïa u nongshimwai ba ym bit ban ai-wai pateng sha ki bar jylla kumba la long ha kiwei pat ki jaka,” la ong ka Seng.
“Kam dei ban don kano kano ka jingai kam ne pyntreikam da ki briew ki bym dei ki trai ri-trai muluk bad ba baroh ki jait kam dei ban ai tang ïa ki trai ri-trai muluk,” la ong shuh shuh ka Seng.
