Ka HANM kan pynbeit hi ïa u pud u sam da ka jingïatreilang bad ki bor shnong: Lam Kharbani

Shillong, Lber, 31: Ka Hynñiewtrep Achik National Movement (HANM) ha ka sngi Palei ka la byrngem ban pynbeit hi noh ïa la u pud u sam da kaba ïatreilang bad ki bor synshar shnong kiba don ha ki shnong khappud hadien ka jingbym hun ïa ka jingïapynbeit pud hapdeng ka Meghalaya bad Assam.
U Myntri Rangbah ka Jylla Meghalaya u Conrad Sangma bad u Himanta Biswa Sarma ki la ïasoi ïa ka Dulir jingïasngewthuh jingmut ha New Delhi ha ka sngi Balang hakhmat u Myntri ka tnat Kam Pohing u Amit Shah ban pynkut noh ïa ka jingïakajia pud hapdeng ka Meghalaya bad ka Assam kaba la neh mynta la sanphew snem kynthih.
“Ka seng ka ladep sngewthuh ïa ka jingthmu jong ka Sorkar da kaba buhrieh ïa ka kopi jong ka Memorandum of Understanding. Ka Seng ka kren da kaba shai ba kam hun ïa kane ka Dulir ba la shu soi donbor da u Myntri Rangbah ka Jylla Meghalaya u Conrad Sangma bad u Myntri Rangbah ka Jylla Assam u Himata Biswa Sarma hakhmat u Myntri ka tnat Kam Pohing ka Ri u Amit Shah,” ong u Bah Lamphrang Kharbani haba ïakren bad ki lad pathai khubor.
“Katkum ka jingïathuh jong u Myntri Rangbah ka Jylla Assam sha ki lad pathai khubor, kumba 1.79 sq.kms ka jaka na Khanapara, na Pilangkata ki la leit lut sha ka jylla Assam bad kynthup ruh ïa ka Maikhuli. Kane ka pyni shai kdar ba ka dei ka jingshahjem bad ka jinglong niangkohnguh jong ka Sorkar Meghalaya hakhmat u Himanta Biswa Sarma bad u Amit Shah,” la ong u Bah Kharbani.
“Hato dei ban pynbeit pud tang u Myntri Rangbah ka Jylla Assam marwei, shu shon muhor pat u Myntri Rangbah ka Jylla Meghalaya,” la buh jingkylli u Bah Kharbani uba dei ruh Chairman jong ka HANM Land Protection Cell.
“Ka Seng ka kren da kaba shai kdar sha ka jaidbynriew lyngba ka HANM Land Protection Cell, kan pynbeit hi noh ïa u pud u sam da ka jingïatreilang bad ki bor shnong, ki bor hima ha khappud. Mat ïa jaw snam, mat jia kumba jia ha Langpih ha u snem 2014 ha kaba 4 ngut ki dkhot jong ka jaidbynriew ki la duhei ïa la ka jong ka jingim ha ka jingshah siat,” la byrngem une u nongïalam ka Seng.
“Ka seng ka byrngem ïa ki suri kup snieh langbrot bad ïa kiba leh benami ha ki jaka khappud,” u la maham.
‘Ka Sorkar kam pat dei satia ban ktah ïa ka (jingïapynbeit pud) ha ka kylla kaba ar (Phase-II) namarba ladep ïohi ïa kaei kaba mih na ka jingïapynbeit pud ha ka kylla kaba nyngkong (Phase-I). Ko, Sorkar Meghalaya ynnai thok, ynnai shukor ïa u paidbah jong ka jylla Meghalaya. U Myntri Rangbah jong ngi u la shukor wat ïa ka Iingdorbar Thawaiñ. Ha ka por ba la pan ïa ka jingthoh kaba bniah halor ka jingïapynbeit pud um shym la ai satia wat ïa ki MLA ne ïa ki dkhot jong ka Iingdorbar Thawaiñ,” la kynnoh u Bah Kharbani.
“Ynnai ïakren ïa ki Autonomous District Council, ynnai ïakren ïa ki Hima kiba ka Sorkar ka ladep ïaid lyndet. Ka Seng ka bitar, ka sngewdom halor kane ka bynta bad ngi kyntu ïa ki nongsynshar jong ngi, la phi ai sngewbha lane phi die lilam, sngewbha ai ïa ka phyllaw lajong, wat ju ai ïa ka khyndew ka shyiap jong ka ri bad ka jaidbynriew,” u la ong.