Shillong, Nailur 21 : Ka lympung ïalehkai badminton kaba la tip kum ka 37th Meghalaya State Badminton Championship ka la sdang hynne ka sngi Balang ha kaba ïa katei ka ka lympung ïalehkai la plie pyrda da u Deputy Commissioner ka West Garo Hills u Swapnil Tembe ha Indoor Sports Hall, Hawakhana, Tura. La don lang ruh ha katei ka sngi u District Sports Officer u Saljagring M. Marak nalor kiwei kiwei.
Ha katei ka lympung kaba la pynlong ha Tura ki don kumba 170 ngut ki nongïalehkai shynrang bad kynthei kiba ïashim bynta kiba la poi na kylleng ki bynta jong ka jylla. Ïa katei ka lympung yn pynkut noh ha ka 24 tarik mynta u Nailur 2022.
Ïa katei ka lympung la lah ban pynlong biang hadien ka jingshah pynthut ha ka khlam jingpang Covid-19 kaba la wan ban lyngshop ïa ki ri ka pyrthei.
