Pdiang burom u President ka HSPDP ïa ki riew rangbah, ki Longkmie bad ki Samla sha ka Party

Nongstoiñ, Lber 31: Ka Hill State People Democratic Party Ri Muliang Zone kaba hap ha ka Rambrai Jyrngam Constituency, ha ka sngi palei ka la pdiang burom na ka bynta kiba bun ki riew rangbah, ki longkmie bad ki samla jong ka dong.
La pynlong ïa ka jingïalang pdiang burom ha ka shnong Tynghor kaba dei ka shnong jong u bah K.P.Pangñiang MLA barim ka Constituency President rangbah ka party u ban sa ïa khun ruh ïa ka election ha u snem ban wan. Ha katei ka jingïalang la pdiang burom kyrpang ruh ïa kiba samla, ki rangbah bad ki longkmie kiba dei ki nongïalam jong kiwei pat ki party, kum na ka Congress bad ka NPP kiba la wan ban pynïasoh sha ka HSPDP.
Kitei ki nongïalam kiba la wan ban pynïasoh ki dei kiba na ka shnong Upper Rangsah, Nongrisan, Megadop, Noonmati, kiba dei ki Garo kiba la ju kyrshan borbah ïa ka party Congress ha ka election MLA bad MDC. Nangta kiwei ki nongïalam jong ka Congress ki dei u bah Ombarly Wanñiang President ka Youth Wing jong ka Congress na ka Nonglang Primary Unit, ryngkat ki nongkyrshan ba kynthup lang ruh ïa ki longkmie.
Ha ka jingïalang ba la pynïaid da u bah D.P.Wanñiang President ka HSPDP Ri Muliang zone, la ïadon ryngkat ruh da u bah K.P.Pangñiang President rangbah, ki sordar shnong, ki riewrangbah bad ki nongkitkam na ki Primary Unit kiba hap hapoh ka zone. Ha shuwa ban sdang ïa ka jingïalang la pdiang burom ïa kiba la wan ban pynïasoh sha ka party da u bah K.P Pangñiang, da kaba pyndeng da ka muffler kum ka dak jong ka jing pdiang burom ïa ki.
Hadien ka jingpdiang burom ïa ki la ïoh ïa ka jingkren na u bah Ombarly Wanñiang, u bah Jethrowell Syiem, u bah Ristonding Marweiñ bad khatduh eh la ïoh ïa ka jingkren na u bah K.P.Pangñiang President rangbah ka party. U bah Ombarly Wanñiang haba ai jingkren, u la ong ba ha ki snem ba la dep kum u President jong ka Congress Youth wing na ka Nonglang Primary Unit u la trei shitom bad ha ka election MLA bad MDC, ka party Congress na ka Nonglang Polling station ka la jop don burom ha baroh ar tylli ki election.
Nalor kata u la ong ruh ba hadien ba u kyrtong MDC ka Congress u la jop u ki nongkyrshan ki la kmen bha, namar haba u ai skhim u ju wan sam ïa ki work order ha khmat ki paitbah hynrei kaba pynlyngngoh pat ka long ba ha ka election MLA pat hadien ba u la jop um shym la leh shuh kumta hynrei u la jah rngai pynban. U la buh jingkylli ruh da kaba ong hato kham heh u MDC ne kham heh u MLA bad hato ka sorkar ka ai skhim tang ïa ki MDC katba ïa ki MLA pat kam ai skhim?.
U la bynrap ruh ba kaba la pynlong ïa u bad ki nongkyrshan ban wan pynïasoh sha ka HSPDP, ka dei hadien ba ki la ïohi ba ka Congress ka la pait la pra lyngkhot lyngkhai ym tang ha ka jylla, hynrei wat ha ka ri India baroh kawei bad kam I don jingkyrmen shuh ba kan dang lah ban khie khlieh bad dei na kata ka daw ba ki hap ban rung noh sha ka HSPDP.
U bah Jethrowel Syiem pat u la ong ba la bun bun phew snem ki la ai jingkyrshan ïa ka Congress bad khamtam eh ki la kyrshan tylli ïa u bah Kimfa S Marbaniang kum u MLA bad u bah Bajop Pyngrope kum u MDC, namar ki dei na ka party Congress. Hynrei ynda ki la jop kim wan mih shuh bad kim ithuh shuh ïa ki, kumta kim banse ban wan pynïasoh noh bad ka HSPDP, namar ba ka shnong jong ki ka don ha jan eh bad ka shnong jong u bah K.P.Pangñiang.
Nalor kata u la ong ruh ba ma u bad baroh ki nongkyrshan jong u bah Kimfa S.Marbañiang bad u bah Bajop Pyngrope, hadien ba ki la ïoh jingtip ba u bah Kimfa u la shah supspend ha ka Congress bad u bah Bajoip Pygnrope u la leit ban pynïasoh bad ka NPP, kim sngew tynnad shuh ïa ki namar lada ki wan sha shnong jong ki kim nang satia ban kren ïa ka ktien Garo hynrei ki kren da ka ktien Hindi.
Hynrei ki nongshong shnong naduh Upper Rangbsah, Bangjeng, Nongrisan, Noonmati bad Megadop, kim sngewthuh ïa ka ktien Hindi bad lehse dei na kata ka daw ba kim kheiñ briew shuh ïa ki.
Ha kajuh ka por u la bynrap ba ka jingwan pynïasoh bad ai jingkyr-shan jong ki ïa u bah K.P.Pangñiang, ka dei namar ba u lah bha ban kren ha ka ktien Garo bad kim don jingeh haba ki ïakren, pan jingïarap na ka bynta ki kam pynroi ha ki shnong ki thaw jong ki bad namar ba u nang bha ïa ka ktien jong ki, ka jing sngewjan bad sngew ieit ïa u ka la ktah bha katba nang mih ki sngi.
Utei u nongïalam ka party u la ong ba ki don shibun kiba kylli ïa u ba kumno u kwah ban dang ïaleh election haba u la rem. Ha kaba u la jubab da kaba shai ba ha ka jingshisha dalade um kwah shuh ban dang ïaleh election, hynrei dei ki paitbah kiba ai mynsiem bad kiba kwah ba un ïaleh biang.
Nalor kata u la ong ba ka long kaba shisha ba ki paitbah ka Rambrai Jyrngam Constituency, hadien ba ki la peit thuh bad bishar bniah ïa ka jinglong jingman ha ka Constituency, baroh ki la ong ba u bah K.P.Pangñiang u dei shisha u ba ki paitbah ka Constituency ka donkam bad dei halor katei ka jingkwah jong ki paitbah ba u la hap ban shim ïa ka rai ba un ïaleh biang ha ka election ban wan.