Shillong, Nailur, 20: Lai ngut ki runar kiba ju donkti ban rong tuh ïa ki thuk thuk ar shaka na kylleng ki bynta bapher bapher ka jylla ki la ngat ha ka ruhnar jong ki Pulit ka Sohra Police Station.
Katkum u kyrwoh ba la phah da u Superintendent of Police (City) u Bah Vivek Syiem, ha 9 tarik mynta u bnai, kawei ka Pulsar Motor Bike ka la shah tuh na ka shnong Laitsohpliah, Sohra bad ki Pulit ki la register case da kaba pyngat hapoh ka Section 379/34 jong ka Indian Penal code.
Ha ka jingtohkit, ki Pulit ki la ïoh jingtip na ki tnat syntiat ba la ïohi ïa kane ka thuk thuk ba la shah rong tuh hajan Mairang.
Mar mar, ka Kynhun ki Pulit na Sohra ki la hiar sha Mairang bad da ka jingïarap jong ki Pulit ka Mairang Police Station ki la lap dien ïa kane ka thuk thuk. Ha ka jingpynap shrip, arngut ki briew ki la shah kem ha Mairang.
Kine ki arngut ki la phla hakhmat ki Pulit ba bun ki thuk thuk ar shaka ki dei kiba la shu tuh na nongbah Shillong da uwei u snar uba dei na ka shnong Nongsohma kaba hap hapoh ka Eastern West Khasi Hills District.
U SP (City) u ïathuh ba ha ka 18 tarik mynta u bnai ha ka por 9:00 baje mynmiet, ki Pulit ka Sohra Police Station ki la hiar sha ka shnong Nongsohma da ka jingïalam lynti da uwei na kiba la shah kem bad ha kane ka kynti la kem ïa u snar nongtuh thuk thuk na ka shnong Nongsohma uba la kubur ba u dei uba ju donkti ban rongtuh ïa ki thuk thuk ar shaka na nongbah Shillong da ka jingïatreilang bad kiwei pat.
Da ka jingphla jong u, ki Pulit ki la ïoh kurup shwa ïa kawei ka Scooty bad ar tylli ki Motor Bike ha kane kajuh ka miet.
Ha ka step jong ka 19 tarik mynta u bnai, kane ka kynhun ki Pulit ba la ïalam da u Officer-in-Charge u Inspector Pynhunlang M. Syiem lem bad u Inspector Phrianglin Syiem u In-charge jong ka Nongthymmai Beath House, u Sub-Inspector Stephen Nongspung uba dei u Investigation Officer uba tohkit ïa kane ka jingshah rong tuh jong ki thuk thuk ar shaka bad ka Special Cell na Shilong ki la kurup sa 11 tylli ki motor bike na ka shnong Nongsohma ba la buhrieh bha ha kawei ka sem.
Ha ka jingtalasi bad tohkit bniah jong ki Pulit, la lap ba ïa kine ki thuk thuk ar shaka ba la pynthymmai bad ïa ki Registration Number Plate la bujli da kiba thok ba la buhrieh ha ka dong Nongkrem kaba hap hapoh ka shnong Nongsohma.
Baroh ki motor Bike ba la ïoh kurup ki long 15 tylli bad kawei ka Scooty.
Ki Pulit mynta ki dang pynlong ïa ka jingtohkit kaba bniah ban thwet sa ïa kiwei pat kiba donkti ban rong tuh ïa ki thuk thuk ar shaka na nongbah Shillong bad na kiwei kiwei ki jaka.
